Alcohol è omnipreschent en noss mintgadi. Tar blers eveniments socials tutga il cüpli u il magiel vin per far viva simplamain vitiers. Da problems u dependenza d'alcohol vegn discurrì pauc.

Alcoholichers ed alcoholicras èn persunas sco ti ed jau. I po capitar a mintgin da survegnir in problem d'alcohol. Tenor las cifras da l'Uffizi federal da sanadad èn en Svizra radund 250'000-300'000 persunas dependentas d'alcohol. Mintga terza persuna ha insatgi cun in problem d'alcohol en ses conturn. La malsogna turmenta per l'ina las persunas dependentas, per l'autra dentant er ils confamigliars.

En questa Marella vegn a pled l'um d'ina alcoholicra. El raquinta co ch'el vegn a frida cun la malsogna da sia dunna. In'ulteriura dunna raquinta da ses cumbat da far frunt la dependenza. Ed in um sa regorda, co ch'el è mitschà da la mort per il nair da l'ungla pervia da ses consum d'alcohol excessiv.