Violenza durant la pagliola? Quai para ina cuntradicziun. Studis mussan però che mintga quarta dunna en Svizra raquinta d'experientschas da violenza durant la pagliola.

Mintga pagliola è in'experientscha unica, e tuttina han blers raquints da dunnas pertutgadas insatge communabel. Las pagliolancas na sa sentan betg prendidas seriusas, impussantas e ch'i saja simplamain «vegnì fatg» cun ellas. Ch'i sajan vegnidas tractadas sco in object, dal qual ins sto prender ora in poppin, tut tenor il credo: «Basta che l'uffant saja saun.» Il donn collateral: la dunna.

En questa Marella vegnan a pled dunnas pertutgadas, vegnan descrits ils mecanissems che promovan quest problem e tge mesiras ch'i duvrass, per che dapli dunnas possian far bunas experientschas durant la pagliola.