-Eg havi ongantíð brúkt vitlíki til nakra prædiku og tað fari eg ongantíð at gera.

So avgjørdur er Derhard Jógvansson, prestur, sum helt prædikuna tá árliga guðstænastan var í Gjónni við Gjógv sunnudagin.

Hann heldur at vitlíki kann vera eitt hent amboð tá prestur eitt nú skal hava onkran skjótan upplýsing, tá hann ivast. Tá er tað nógv skjótari enn at taka bøkurnar fram. Men tá er sjálvandi neyðugt at kenna bakgrundina í gudfrøðini, sum prestur ger.

Spurningurin um at brúka vitlíki í sambandi við pædikuna hjá presti hevur verið nógv umrøddur í Danmark í seinastuni, eftir at danska prestafelagið hevur fingið gjørt ein kjattpott, ið er ætlaður prestum. Har er ein frágreiðing hvussu vitlíkið kann skriva eina lidna prædiku ella t.d. eina jarðarferðartalu.

-Í kirkjuni hava vit eitt guðsforhold og ein felagsskap. Vitlíki hevur einki guðsforhold, sigur Derhard Jógvansson.

Hoyr samrøðuna við Derhard Jógvansson í Summarmorgni her.