Dütmal dreiht sik dat bi "Wi snackt Platt" ganz veel wat üm plattdüütschet Theater! Wi sünd bi dat Theater 99 in Curslook un bi’n Theatervereen Rellingen to Besöök. Dat Theater 99 fiert an'n Freedag, den 4. April, Premieer mit dat Stück "To'n güllen Uhu" vun de Schwiezer Autorin Claudia Gysel. De Theatervereen Rellingen is vunaf Sünndag, den 6. April, mit en plattdüütsche Uropföhren vun Konrad Hansen sien Kummedie "De Kieskuhl" to beleven. Wi hebbt de twee Amateurtheaters voraf bi jümehr Proven besöcht, snackt mit de Lüüd un vertellt Jo mehr över de Stücken, de speelt warrt. Man dat is lang noch nich allens, denn bi "Wi snackt Platt" stellt wi Jo dütmal ok noch Jonny Ubben vör! Egens is Jonny Ubben alias Jens Cramer siet vele Johrn Sänger vun’e plattdüütsche Punkband „De Schkandalmokers“, man nu, nu hett he en ne’et Solo-Album rütbröcht. "So sücht dat ut" heet dat - un dorop to höörn: Country-Musik op Platt.