"Plattdüütsch is Kultur! Un Kultur smitt man nich weg. Ne, man heegt un pleegt ehr." - Dat weer dat Motto vun Hein Thies ut Glinn. He weer de Mann achter dat Wöörbook, den ne'en SASS. Verleden Maand - an'n 10. Juli - is Hein Thies in't Öller vun 85 Johr na en lange un swore Krankheit storven. De Plattdüütschen truert üm en Minschen, de sik üm uns plattdüütsche Spraak kümmert hett as meist keen anner. Bi "Wi snackt Platt" kiekt wi noch mal trüch op sien Engagement.

Noorden vun Hamborg, baven in Sleswig-Holsteen twüschen Neemünster un Rendsborg - in Noorddörp (Nortorf) - dor gifft dat dat Düütsche Schallplattenmuseum, wo ok de Schallplattenarchiven vun'n NDR ut Kiel un Hamborg henkamen sünd. Gerrit Hoss vertellt bi "Wi snackt Platt" mehr över dat Museum.

Bavento gifft dat denn ok noch veel wat över Beer to weten. Benita Brunnert hett mit Arne Christiansen snackt. He is Plattsnacker un beedt an'n 30. August in'n Lichtwarksaal vun'e Carl-Toepfer-Stiften en Beerverkosten op Platt an.

Dat allens - un noch 'n beten wat mehr - dat gifft dat dütmal bi "Wi snackt Platt" to hören.

De Leder in uns Sennen:

Iko Andrae - Mank all mien Drööm

Otto Groote Ensemble - Min Jehann

Yared und die Schlickrutscher - Klei mi an Mors

Charmonia - Help

Knipp Gumbo - Marie Marie

Moderatschoon: Jürgen Fitschen