Xeev Victoria lub chaw hais plaub Supreme Court thiab tej neeg mus koom hais plaub tau pom zoo tias Mr Adam Margolis yog tus txhaum vim nws tau muab tus ntxhais hluas Hmoob hu ua Maiv Vaj zawm caj dab tas sim neej rau hnub tim 28 Feb 2018, thiab tseem yuav hais plaub txuas ntxiv rau hnub tim 23 lub 4 hlis ntuj xyoo 2021 tom ntej no seb yuav txiav txim nws li cas ntxiv. Thiaj yog ib rooj plaub cuam tshuaj txog txoj kev hlub tig los ua kev tu siab thiab tseem cuam tshuam rau tej teeb meem kub ntxhov hauv lub cuab yig (domestic violence). Raws li lub koom haum Australian Institutute of Health and Welfare tau qhia ces yeej muaj 1 tug ntawm 6 tus poj niam los yog ib tug txiv neej ntawm 16 tus twg rau lawv tus hluav nraug, los sis yog lawv tus txiv tam sim no los yog dhau los ntaus lawv thiab yuam deev lawv, los yog xam tias muaj txhua txhua 1 tug poj niam tas sim neej txhua txhua 9 hnub twg thiab 1 tug txiv neej tas sim neej txhua txhua 29 hnub twg los ntawm cov teeb meem family violence no.