Cun ina gronda festa ("Brassastisch") ha Brass Band Bürgermusik Lucerna festivà l'entschatta da zercladur ses grond giubileum. 

Sia derivanza ha la furmaziun da la fusiun da la Harmoniei-Musik Lucerna e la Gütschmusik l'onn 1922. Fin ils onns 60 è la Bürgermusik stada ina musica d'armonia. Il 1967 è ella sa transfurmada en ina brass band ed ha dapi lura fatg furora sco musica d'excellenta qualitad. Il 2014 gudogna la BML sco emprima brass band svizra il titel da campiun d'Europa.

Er part da l'istorgia da la BML fa in musicist rumantsch. Corsin Tuor ha sunà ed er dirigì intgins onns la band A sco er la band B. Cun el avain nus er pudì discurrer davart sias experientschas e la BML sco bun exempel per la scolaziun da musicantas e musicants giuvens.