【阿门粤语课零基础版第200期】

今日词语/句子：

    阿门粤语课唔知唔觉已经做到200期，我系约莫185期先开通打赏嘅，因为我之前根本唔知要开通，所以等于我个人成为咗历史上第一个千万级播放量但系冇接受打赏嘅主播。趁住阿门粤语课200期，我个人做个总结同展望。一开始做呢个节目完全系无心嘅，因为一开始我见到喜马拉雅上面其实都有几个粤语主播，播放量都唔错。后嚟我发现有问题，因为呢啲主播里面真正粤语发音标准嘅，女嘅得两个，男嘅得一个，男嘅净低嗰个仲要停播咗。而女嘅嗰两个亦都更新唔多。

    撇开口音标准同音色好听嚟讲，成年人学一样嘢，系冇可能好似细路仔噉样，日日系度背单词，学拼音，事实上我亦都冇发现有人系噉样学好咗粤语。太过于娱乐嘅节目，就会显得唔专业。于是乎我做咗阿门粤语课，每天一个有价值嘅句子或者短文加一个俗语讲解。成年人如果系日日系度学埋晒啲咩“早晨”啊，“早唞”啊，其实几昂居，所以我希望大家喺学粤语嘅时候，都可以学埋其他嘢。例如“三观”，“眼界”，“社会洞察”，“哲学与心理学”等。我亦都力求将复杂嘅知识同道理讲得有趣啲，而唔系单单追求有趣。我慢慢意识到，有素质，有眼光去学噉样嘅嘢嘅人，其实系全社会其实唔多。我每日接触各个阶层嘅学生，我意识到其实大部分人每日都系忙于生计，思考对佢哋嚟讲系一件好奢侈嘅事。所以，阿门粤语课打算无限期暂停。

    取而代之嘅系，阿门粤语课2.0版。

    从201期开始，阿门粤语课会新增“历史的今天”同“今天的历史”两个小栏目。以前嘅课程都系每日一个句子或者短文加一个俗语。当然啦，由于我个人每日学习嘅学科非常多，所以内容都涉及到心理学，哲学，历史，文学，经济学，市场营销，辩论，社会洞察，思维训练，批判性思维等等等等。噉样嘅好处在于，你每日都唔知道会学啲咩，会拓宽你嘅眼界，保留一份惊喜。但系每日嘅内容同今日，其实冇咩关系。

    所以“历史的今天”同“今天的历史”会补全呢部分嘅内容。“历史的今天”会讲下喺历史上，今日发生过咩事，有咩我哋忽略咗嘅事实。而“今天的历史”会讲下今日或者最近，发生咗咩事，足以喺历史上留低印记。好喇，介绍就讲咁多。接下嚟，如无意外，我希望可以一直更新到10000期，如果我身体允许。但亦都非常需要大家嘅配合，呢个配合其实对比我每日做嘅事非常简单。就系，第一，你要保持每日嚟听，唔好嘥晒啲内容；第二，你必须要点赞，对我嘅劳动表示一个简单嘅回应；第三，你可以对自己感兴趣有共鸣嘅内容，有疑问嘅地方，进行评论互动；第四，你可以保持每日打赏零钱，数额唔需要多，我亦都冇打算靠呢个嚟赚钱。我嘅课时费系500-900蚊一个钟，做粤语课更多只系我嘅一个兴趣而已。当然啦，兴趣都要做得专业，专业系一种习惯，而唔单止系一种状态。

    希望我每日嘅阿门粤语课可以帮到你成为一个更出色嘅人。