Al Son

El movimientu de reivindicación y normalización llingüística entamó modernamente n'Asturies nel añu 1974 col nacimientu de l'asociación Conceyu Bable y la posterior creación en 1980 de l'Academia de la Llingua Asturiana. Esti procesu dase más tardíamente en Lleón, Zamora y Miranda del Douru, toes elles zones onde la nuestra llingua tien presencia. A la música y les palabres que se dan nel llamáu dominiu llingüísticu asturianu dedicamos esti programa.

La pandereta ye ún de los instrumentos más representativos de la música asturiana. Son milenta les persones que tresmitieron de xeneración a xeneración los cantares populares asturianos con una pandereta y un panderu na mano, faciendo por caltener encesa la tradición sonora del país. Güei ta viviendo ún de los meyores momentos de les últimes décades. Hai tou un 'boom' de la pandereta, con dellos grupos que-y dan protagonismu nel so repertoriu, con xuntances y eventos nos que ye l'instrumentu hexemónicu.

Una de les peculiaridaes más llamatives de los vaqueiros d'alzada ye'l so folclor, bien bayurosu y tovía vixente; nel aspectu musical destaquen, ensin dulda, les «vaqueiraes», cantares mui característicos de calter rítmicu y potente que trescendieron el so ámbitu pa convertise nún de los iconos de la música vocal asturiana.

Na música asturiana tamién tenemos los nuestros cantares imprescindibles. La RPA fixo un especial nel añu 2018 dedicáu a los 25 meyores cantares de la historia de la música asturiana. Más de 30 persones vinculaes al mundu de la música y de la cultura del país escoyeron eses canciones que consideren fundamentales na nuestra historia sonora. Nesti programa recuperamos esa llista de los meyores cantares de la música asturiana, centrándonos nos que formen el Top 10.

La música vien acompañando dende siempre al ritual sidreru. Nun hai xuntanza d'amigos y amigues, cena nuna sidrería o espicha que se precie na que nun s'entonen unos cantarinos tomando unos culetes. Amás d'estos cantares populares de chigre, de sobra conocíos por toos y toes, son munchos los artistes contemporáneos que fixeron composiciones nueves con lletres dedicaes a la sidra.

Esta comarca fronteriza ente Asturies y Galicia tien una situación llingüística propia onde'l gallego-asturianu sigue tovía bien vivu. Otra manera, históricamente esta zona, nel planu musical, foi mui rica y dinámica, con bandes de música, intérpretes tradicionales y un fenómenu como'l de les bandines o orquestines que se dio abondantemente. Tamién el folk fechu naquellos conceyos foi pasín ente pasu ocupando'l so espaciu na escena musical del país, y modernamente tamién el gallego-asturianu llegó a otros estilos como'l rock, el pop o la canción d'autor.

Los dieciséis conceyos del occidente asturianu asitiaos ente los ríos Navia y Eo foron conocíos históricamente colos nomes de Tierres del Navia-Eo o Entrambasauguas, una comarca con un pasáu común, que tamién comparte aspectos culturales, llingüísticos y sociolóxicos mui peculiares y autóctonos que-y dan una personalidá propia dientro d'Asturies. El musical ye tamién un aspectu común a toos estos territorios fronterizos, dándose una influyencia y interrellación colos sones y ritmos de la vecina Galicia.

Dende hai un tiempu vienen surdiendo iniciatives que busquen adaptar la promoción musical a los vezos actuales que tien la xente pa consumir música. Con esti oxetivu, nel 2019 nació 'Amosando', un ciclu de presentaciones de novedaes discográfiques con un formatu que ye una mezcla ente un conciertu acústicu con aforu reducíu, un programa de televisión y un alderique; too ello retresmitíu per Internet pa que llegue a más persones de tol mundu.

El 5 d'ochobre de 1934, declárase una Fuelga Xeneral Revolucionaria en tol Estáu español. Ésta tuvo poca repercusión en xeneral, pero n'Asturies la fuercia que tenía'l movimientu obreru fixo que la llama de la rebelión prendiera, convirtiendo l'ochobre asturianu na última revolución obrera d'Europa. L'alcordanza d'estos fechos tuvo muncha presencia na música asturiana, con cantares que llamaron a caltener viva la memoria histórica d'esta tierra.