Mikil umræða hefur átt sér stað í samfélaginu vegna líkamlegs og andlegs álags á starfsfólk á vinnumarkaði. Algengustu ástæður nýgengi örorku á Íslandi eru geðraskanir og stoðkerfisvandi. Óhóflegt álag á vinnustöðum er til þess fallið að auka líkur á heilsutjóni af ýmsu tagi og getur leitt til kulnunar í starfi. Embætti landlæknis, Vinnueftirlit ríkisins og VIRK Starfsendurhæfingarsjóður eru í samstarfi varðandi heilsueflingu og forvarnir á vinnusvið stöðum og við fengum Ingibjörgu Loftsdóttur sem er sviðstjóri hjá VIRK og ræddum við hana um vellíðan á vinnustað og lykilþætti til að forðast streitu og álag.

Í gær voru fimmtíu ár síðan Ísland og Kína tóku upp stjórnmálasamband. Við fengum Þorkel Ólaf Árnason, formann Kínversk-íslenska menningarfélagsins í þáttinn til að segja okkur sögu félagsins og hans kynnum af Kína. En hann stundaði nám í háskóla í Guangzhou og bjó þar í fimm ár. Þorkell fræddi okkur um Kína og menningarfélagið í dag.

Steinar Þór Ólafsson þekkja okkar föstu hlustendur frá því að hann var með pistla í Mannlega þættinum sem hann kallaði Kontóristinn, þar sem hann fjallaði á áhugaverðan hátt um ýmislegt sem viðkom vinnustaðamenningu. En við rákum augun í pistil sem hann skrifaði í Viðskiptablaðið með fyrirsögninni Vinir óskast. Þar fjallar hann um vináttu og það hvernig hann hefur verið að lesa sig til um það hvernig sé best að eignast nýja vini og rækta þá gömlu. Því í gegnum skólagönguna og æskuárin eignast flestir vini fyrir lífstíð, en það getur reynst töluvert flóknara þegar við verðum fullorðin. Steinar kom í þáttinn í dag og ræddi við okkur um vináttu.

UMSJÓN GUÐRÚN GUNNARSDÓTTIR OG GUNNAR HANSSON