AraliKatte ಅರಳಿಕಟ್ಟೆ

ಈ ವರ್ಷ ವಿಶ್ವದ ಅತಿ ಶ್ರೀಮಂತ ವ್ಯಕ್ತಿಗಳ ಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದ ಮಸ್ಕ್ ತನ್ನ ದಣಿವರಿಯದ ಪರಿಶ್ರಮದಿಂದ ಹೆಸರುವಾಸಿ. ಆದರೆ ಆತನ ವ್ಯಕ್ತಿತ್ವಕ್ಕೆ ಕರಾಳ ಮುಖವೂ ಇದೆ. ವರ್ಷಗಟ್ಟಲೆ ತನ್ನ ಕಂಪೆನಿಯಲ್ಲಿ ನಿಯತ್ತಿನಿಂದ ಕೆಲಸ ಮಾಡಿದವರನ್ನು ಆತ ಚೂರೂ ಅನುಕಂಪವಿಲ್ಲದೆ ಮನೆಗೆ ಕಳುಹಿಸಿದ ಉದಾಹರಣೆಗಳಿವೆ. ತನ್ನ ಕಂಪೆನಿಗಳಲ್ಲಿ ನೌಕರಿಗೆ ಆಯ್ಕೆಯಾಗುವವರಿಗೆ ಗೆಳೆಯ/ಗೆಳತಿಯರು ಇರಬಾರದು ಹಾಗೂ ಅವರು ತಮ್ಮ ಸಂಪೂರ್ಣ ಸಮಯವನ್ನು ಕೆಲಸಕ್ಕೆ ಮೀಸಲಿಡಬೇಕು ಎಂದು ಅಪೇಕ್ಷಿಸುತ್ತಾನೆ. ತನ್ನ ಮಗುವಿನ ಜನನಕ್ಕೆ ಸಾಕ್ಷಿಯಾಗಲು ಕೆಲಸ ತಪ್ಪಿಸಿಕೊಂಡ ನೌಕರನಿಗೆ ಮಸ್ಕ್ ಕಟ್ಟುನಿಟ್ಟಾದ ಟಿಪ್ಪಣಿ ಬರೆಯುತ್ತಾನೆ: "ನಮ್ಮ ಸಂಸ್ಥೆಯಲ್ಲಿ ನಾವು ಜಗತ್ತನ್ನೇ ಬದಲಿಸುವ ಮಹತ್ಕಾರ್ಯದಲ್ಲಿ ತೊಡಗಿದ್ದೇವೆ. ನಿನಗೆ ಕೆಲಸ ಮುಖ್ಯವೋ ಅಥವಾ ಕುಟುಂಬ ಮುಖ್ಯವೋ ಎಂದು ನಿರ್ಧರಿಸು."!

ಆದಾಗ್ಯೂ ಅಮೇರಿಕಾದ ಪ್ರತಿಷ್ಠಿತ ಕಾಲೇಜುಗಳಲ್ಲಿ ಓದಿದ ವಿದ್ಯಾರ್ಥಿ, ವಿದ್ಯಾಥಿನಿಯರು ಈಲಾನ್ ನ ಕಂಪೆನಿಗಳಲ್ಲಿ ಕೆಲಸ ಮಾಡಲು ಹಾತೊರೆಯುತ್ತಾರೆ. ಪ್ರತಿಷ್ಠಿತ ಕಂಪೆನಿಗಳಲ್ಲಿ ಉನ್ನತ ಹುದ್ದೆಯಲ್ಲಿರುವವರು ಅಲ್ಲಿನ ಬ್ಯೂರಕ್ರಸಿಯಿಂದ ಬೇಸತ್ತು ಈಲಾನ್ ನ ಕಂಪೆನಿಗಳಲ್ಲಿ ತಮ್ಮ ಸೃಜನಶೀಲತೆಗೆ ದೊರೆಯುವ ಸ್ವಾತಂತ್ರ್ಯಕ್ಕಾಗಿ ಕೆಲಸಕ್ಕೆ ಸೇರುತ್ತಾರೆ.

ಹೀಗೆ ಅನೇಕ ದ್ವಂದ್ವಗಳ ಪ್ರತಿರೂಪವಾದ ಈಲಾನ್ ಮಸ್ಕ್ ಕುರಿತು ಅಮೇರಿಕಾದ ಪತ್ರಕರ್ತ ಆಶ್ಲೀ ವ್ಯಾನ್ಸ್ ಬರೆದಿರುವ ಅಧಿಕೃತ ಜೀವನ ಚರಿತ್ರೆ ಕುರಿತ ಚರ್ಚೆಯ ಎರಡನೆಯ ಹಾಗೂ ಅಂತಿಮ ಭಾಗ ಅರಳಿಕಟ್ಟೆಯ ನಲವತ್ತಾರನೆಯ ಸಂಚಿಕೆಯಲ್ಲಿ ನಿಮ್ಮ ಮುಂದಿದೆ. ಚರ್ಚೆಯಲ್ಲಿ ಭಾಗವಹಿಸಿದವರು ಮುಕುಂದ್, ಸುಪ್ರೀತ್ ಹಾಗೂ ವಾಸುಕಿ.

Recording date: 26 December 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ಈಲಾನ್ ಮಸ್ಕ್ ಹೆಸರು ಈಗ ಜನಜನಿತವಾಗಿದೆ. ಇದಕ್ಕೆ ಕಾರಣ ಆತ ಜಗತ್ತಿನ ಅತಿ ಶ್ರೀಮಂತ ವ್ಯಕ್ತಿ ಎಂಬ ಮನ್ನಣೆಗೆ ಪಾತ್ರನಾಗಿದ್ದು. ಕೆಲವರಿಗೆ ಆತನ ಟೆಸ್ಲಾ ಕಾರ್ ಕಂಪೆನಿಯ ಪರಿಚಯವಿರಬಹುದು. ಹಲವರಿಗೆ ಆತನ ಸ್ಪೇಸ್ ಎಕ್ಸ್ ಎಂಬ ರಾಕೆಟ್ ಕಂಪೆನಿಯ ಪರಿಚಯವಿರಬಹುದು.

ಆದರೆ ಆಧುನಿಕ ಎಡಿಸನ್ ಎಂದೇ ಕರೆಯಲ್ಪಡುವ ಈಲಾನ್ ಮಸ್ಕ್ ಒಬ್ಬ ವ್ಯಕ್ತಿಯಾಗಿ ಎಷ್ಟು ಜನರಿಗೆ ತಿಳಿದಿದ್ದಾನೆ? ವೈಯಕ್ತಿಕ ಜೀವನದಲ್ಲಿ ತನ್ನ ಕಾಲದ ಸರಕಾರದ ಮೂಗುತೂರಿಸುವಿಕೆಯಿಂದ ಕಿರಿಕಿರಿಗೊಳಗಾಗಿ ಕೆನಡಾದಿಂದ ದಕ್ಷಿಣ ಆಫ್ರಿಕಾಗೆ ವಲಸೆಹೋದ ಈಲಾನ್ ಮಸ್ಕ್ ತಾತನ ವ್ಯಕ್ತಿತ್ವ ಎಂಥದ್ದು? ಚಿಕ್ಕಂದಿನಲ್ಲೇ ಅಪ್ರತಿಮ ಬುದ್ದಿಮತ್ತೆಯ ಕಿಡಿ ಬೆಳಗಿದ ಆದರೆ ಕ್ರೂರ ದೈಹಿಕ ಹಾಗೂ ಮಾನಸಿಕ ಹಿಂಸೆಗೆ ಒಳಗಾದ ಈಲಾನ್ ಬಾಲ್ಯ ಹೇಗಿತ್ತು?

ಮೊದಲ ಎರಡು ಸಾಫ್ಟ್ ವೇರ್ ಕಂಪೆನಿಗಳನ್ನು ಮಾರಿ ಕೋಟ್ಯಾಧಿಪತಿಯಾದ ಈಲಾನ್ ಆ ಎಲ್ಲ ಸಂಪತ್ತನ್ನು ಕಳೆದುಕೊಳ್ಳುವ ಹಂತಕ್ಕೆ ತಲುಪಿದ್ದು ಆಕಾಶದೆಡೆಗೆ ದೃಷ್ಟಿ ನೆಟ್ಟು ರಾಕೆಟ್ ನಿರ್ಮಿಸುವ ಕಂಪೆನಿ ಪ್ರಾರಂಭಿಸಿದಾಗ, ಸತ್ತು ಸತ್ತು ಬದುಕುಳಿದ ಟೆಸ್ಲಾ ಕಾರು ಕಂಪೆನಿಯ ನಿರ್ವಹಣೆ ಹೊತ್ತಾಗ.

ಸಣ್ಣ ಸೂಜಿಯಿಂದ ಹಿಡಿದು ಅತ್ಯಾಧುನಿಕ ಕಂಪ್ಯೂಟರ್ ಚಿಪ್ ವರೆಗೆ ಕೈಗಾರಿಕೆಗಳು ಅಮೇರಿಕಾದಿಂದ ಕಾಲ್ಕಿತ್ತ ಸಂದರ್ಭದಲ್ಲಿ ಈಲಾನ್ ಸ್ಪೇಸ್ ಎಕ್ಸ್ ಹಾಗೂ ಟೆಸ್ಲಾ ಎರಡೂ ಕಂಪೆನಿಗಳ ಸಮಸ್ತ ಉತ್ಪಾದನೆಯನ್ನು ಅಮೇರಿಕಾದಲ್ಲಿಯೇ ಸ್ಥಾಪಿಸಿದ. ಜಾಗತಿಕ ತಾಪಮಾನ ಏರಿಕೆಗೆ ಕಾರಣವಾಗುವ ಹಾಗೂ ಮಧ್ಯ ಪ್ರಾಚ್ಯದಲ್ಲಿ ಕೊನೆಯಿಲ್ಲದ ಯುದ್ಧಗಳಿಗೆ ದಾರಿ ಮಾಡಿಕೊಡುವ ತೈಲದ ಅವಲಂಬನೆಯಿಂದ ಮನುಕುಲವನ್ನು ಮುಕ್ತಗೊಳಿಸುವ ಕನಸನ್ನು ಟೆಸ್ಲಾ ಮೂಲಕ ಸಾಕಾರ ಮಾಡಹೊರಟ. ಒಮ್ಮೆ ಬಳಸಿ ಬಿಸಾಡುವ ದುಬಾರಿ ರಾಕೆಟ್ ಗಳ ಬದಲಿಗೆ ಮರುಬಳಕೆಗೆ ಸಿದ್ಧವಾದ ರಾಕೆಟ್ ಗಳಿಂದ ಬಾಹ್ಯಾಂತರಿಕ್ಷವನ್ನು ಅನ್ವೇಷಿಸುವ ಮನುಕುಲದ ಆಕಾಂಕ್ಷೆಗೆ ಕುಮ್ಮಕ್ಕು ನೀಡಹೊರಟ. ಆಧುನಿಕ ಅನ್ವೇಷಣೆಗಳೆಲ್ಲ ಮುಗಿದು ಹೋದವು ಎನ್ನುವ ಮನಸ್ಥಿತಿಯ ಸಮಾಜದ ನಡುವೆ ಹೊಸತನ್ನು ಅರಸಿ ಹೊರಡುವುದು ಈಲಾನ್ ನ ಹಿರಿಮೆ. ಈಲಾನ್ ಮಸ್ಕ್ ಮುಖ್ಯವಾಗುವುದು ಈ ಕಾರಣಗಳಿಗಾಗಿ.

ಅಮೇರಿಕಾದ ಪತ್ರಕರ್ತ ಆಶ್ಲೀ ವ್ಯಾನ್ಸ್ ಬರೆದಿರುವ ಈಲಾನ್ ಮಸ್ಕ್ ಕುರಿತ ಅಧಿಕೃತ ಜೀವನ ಚರಿತ್ರೆ ಅರಳಿಕಟ್ಟೆಯ ನಲವತ್ತೈದನೆಯ ಸಂಚಿಕೆಯಲ್ಲಿ ನಿಮ್ಮ ಮುಂದಿದೆ. ಚರ್ಚೆಯಲ್ಲಿ ಭಾಗಬಹಿಸಿದವರು ಮುಕುಂದ್, ಸುಪ್ರೀತ್ ಹಾಗೂ ವಾಸುಕಿ.

Recording date: 26 December 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ದಿನನಿತ್ಯದ ಬಳಕೆಯ ವಸ್ತುಗಳಿಂದ ಹಿಡಿದು ಐಫೋನ್ ವರೆಗೆ ವಿನ್ಯಾಸ ಅಡಕಗೊಂಡಿರುತ್ತದೆ. ತಾಂತ್ರಿಕವಾಗಿ ಒಂದೇ ಗುಣಮಟ್ಟವಿದ್ದರೂ ಕೆಲವು ಉಪಕರಣಗಳು ತಮ್ಮ ಅತ್ಯುತ್ತಮವಾದ ವಿನ್ಯಾಸದಿಂದ ಬಳಸುವವರ ಜೀವನವನ್ನು ಉತ್ತಮಗೊಳಿಸಿದರೆ ಮತ್ತೆ ಕೆಲವು ಕಳಪೆ ವಿನ್ಯಾಸದಿಂದಾಗಿ ಕಿರಿಕಿರಿಯುಂಟು ಮಾಡುತ್ತವೆ.

ಬಳಕೆದಾರರ ಅನುಭವವನ್ನು ಉತ್ತಮಗೊಳಿಸುವ ಉದ್ದೇಶದಿಂದ ಉಪಕರಣಗಳನ್ನು, ಸೇವೆಗಳನ್ನು ವಿನ್ಯಾಸಗೊಳಿಸುವ ಶಿಸ್ತಿಗೆ ವಿನ್ಯಾಸ ಚಿಂತನೆ ಅಥವಾ ಡಿಸೈನ್ ಥಿಂಕಿಂಗ್ ಎಂದು ಕರೆಯುತ್ತಾರೆ. ಈ ವಾರದ ಸಂಚಿಕೆಯಲ್ಲಿ ನಾವು ನ್ಯಾಶನಲ್ ಇನ್ಸ್ಟಿಟ್ಯೂಟ್ ಆಫ್ ಡಿಸೈನ್ ನಲ್ಲಿ ಪದವಿ ಪಡೆದ ಅರವಿಂದ ದೇವರಮನೆಯವರೊಂದಿಗೆ ಡಿಸೈನ್ ಥಿಂಕಿಂಗಿನ ಹಲವು ಆಯಾಮಗಳನ್ನು ಚೇತೋಹಾರಿಯಾದ ಉದಾಹರಣೆಗಳೊಂದಿಗೆ ಚರ್ಚಿಸಿದ್ದೇವೆ.

ಜರ್ಮನಿಯಲ್ಲಿ ನಿರ್ಮಾಣವಾಗುವ ಉಪಕರಣಗಳು, ಜಪಾನ್, ಸ್ಕಾಂಡಿನೇವಿಯಾದಲ್ಲಿ ನಿರ್ಮಾಣವಾಗುವ ಉಪಕರಣಗಳ ವಿನ್ಯಾಸದಲ್ಲಿರುವ ಲಕ್ಷಣಗಳೇನು? ನಮ್ಮ ದೇಶದ ಚೊಂಬಿನ ವಿನ್ಯಾಸ ವಿಶ್ವದಲ್ಲೇ ವಿಶಿಷ್ಟವಾದದ್ದು ಏಕೆ? ದೇವರಮನೆಯ ಇರುವೆ ಚಟ್ನಿ ಕುರಿತು ಕೇಳಿದ್ದೀರಾ? ಬೆಂಗಳೂರಿನಲ್ಲಿ ದರ್ಶಿನಿ ಹೋಟೆಲ್ ಪ್ರಾರಂಭಿಸಿದವರು ಯಾರು ಗೊತ್ತೆ? ಪಾರಂಪರಿಕ ಭಾರತೀಯ ಶೌಚಾಲಯ ಹಾಗೂ ಅಡುಗೆ ಮನೆಗಳಲ್ಲಿ ಅಡಗಿರುವ ವಿನ್ಯಾಸದ ತತ್ವಗಳೇನು? ಹೀಗೆ ಹಲವು ಒಳಸುಳಿಗಳುಳ್ಳ ಆಸಕ್ತಿಕರ ಚರ್ಚೆ ಅರಳಿಕಟ್ಟೆಯ ನಲವತ್ನಾಲ್ಕನೆಯ ಸಂಚಿಕೆಯಲ್ಲಿ ನಿಮ್ಮ ಮುಂದಿದೆ.

Recording date: 23 November 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

Show Notes:

- volkswagen designer giorgetto jujiro

- Dieter Rams: 10 Timeless Commandments for Good Design: https://www.interaction-design.org/literature/article/dieter-rams-10-timeless-commandments-for-good-design

- R Prabhakar founder of Darshini hotels - https://economictimes.indiatimes.com/small-biz/startups/r-prabhakar-the-man-behind-bengalurus-darshinis/articleshow/45224627.cms

- ChewDa.com is a platform to bring together amazing ladies who can prepare yummy snacks, pickles, instant food mixes, masalas and much more.. https://www.chewda.com

ಒಂದು ಬೆಲ್ಟ್ ಒಂದು ರೋಡ್ ಚೀನಾದ ಕಮ್ಯುನಿಸ್ಟ್ ಪಕ್ಷದ ಅತ್ಯಂತ ಮಹತ್ವಾಕಾಂಕ್ಷಿ ಯೋಜನೆ. ೨೦೧೩ರಲ್ಲಿ ಚಾಲನೆಗೊಂಡಿತು. ೭೦ಕ್ಕಿಂತ ಹೆಚ್ಚು ರಾಷ್ಟ್ರಗಳ ನಡುವೆ ನಿಕಟವಾದ ವ್ಯಾಪಾರದ ನಂಟು ಬೆಸೆಯುವ ದೊಡ್ಡ ಕನಸನ್ನು ಚೀನಾ ಹೊಂದಿದೆ. ಇದರ ಭೌಗೋಳಿಕ ವ್ಯಾಪ್ತಿಯಷ್ಟೇ ದೊಡ್ಡದು ಇದರ ಕಾಲಾವಧಿ. ೨೦೪೯ರಲ್ಲಿ ಯೋಜನೆ ಪೂರ್ಣಗೊಳಿಸುವ ಗುರಿ ಚೀನಾದ್ದು.

ಈ ಯೋಜನೆ ಚೀನಾದ ವಿದೇಶಾಂಗ ನೀತಿಗೆ ಎಷ್ಟು ಮುಖ್ಯವೆಂದರೆ, ೨೦೧೭ರಲ್ಲಿ ಯೋಜನೆಯ ಅನುಷ್ಠಾನದ ಗುರಿಯನ್ನು ಸಂವಿಧಾನದಲ್ಲಿ ಅಳವಡಿಸಲಾಯಿತು. ೨೦೪೯ರೊಳಗೆ ಸರಕಾರದಲ್ಲಿ ಏನೇ ಬದಲಾವಣೆಗಳಾದರೂ ಯೋಜನೆಯ ಅನುಷ್ಠಾನದಲ್ಲಿ ವ್ಯತ್ಯಯ ಉಂಟಾಗದು.

ಈ ಯೋಜನೆಯ ಹಿಂದಿರುವ ಚೀನಾದ ಮಹತ್ವಾಕಾಂಕ್ಷೆ ಏನು? ನಮ್ಮ ನೆರೆಯ ಪಾಕಿಸ್ತಾನ, ಶ್ರೀಲಂಕದಿಂದ ಮೊದಲುಗೊಂಡು ದೂರದ ಆಫ್ರಿಕಾ ಖಂಡದ ದೇಶಗಳು ಸೇರಿದಂತೆ ಇದರಲ್ಲಿ ಪಾಲುಗೊಂಡಿರುವ ರಾಷ್ಟ್ರಗಳ ಭವಿಷ್ಯವೇನು? ಭಾರತ, ಜಪಾನ್ ಸೇರಿದಂತೆ ಅನೇಕ ರಾಷ್ಟ್ರಗಳು ಈ ಯೋಜನೆಯನ್ನು ವಿರೋಧಿಸುತ್ತಿರುವುದೇಕೆ? ಇವೇ ಮೊದಲಾದ ಕುತೂಹಲಕಾರಿ ಅಂಶಗಳನ್ನು ವಿವರವಾಗಿ ಚರ್ಚಿಸುವ ಪೋರ್ಚುಗೀಸ್ ಲೇಖಕ ಬ್ರುನೋ ಮಶೆಸ್ ರ ಪುಸ್ತಕ "ಬೆಲ್ಟ್ ಅಂಡ್ ರೋಡ್, ಎ ಚೈನೀಸ್ ವರ್ಲ್ಡ್ ಆರ್ಡರ್" ಕುರಿತ ಚರ್ಚೆಯ ಎರಡನೆಯ ಹಾಗೂ ಅಂತಿಮ ಭಾಗ ಅರಳಿಕಟ್ಟೆಯ ನಲವತ್ಮೂರನೆಯ ಸಂಚಿಕೆಯಲ್ಲಿ...

Recording date: 8 November 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ಒಂದು ಬೆಲ್ಟ್ ಒಂದು ರೋಡ್ ಚೀನಾದ ಕಮ್ಯುನಿಸ್ಟ್ ಪಕ್ಷದ ಅತ್ಯಂತ ಮಹತ್ವಾಕಾಂಕ್ಷಿ ಯೋಜನೆ. ೨೦೧೩ರಲ್ಲಿ ಚಾಲನೆಗೊಂಡಿತು. ೭೦ಕ್ಕಿಂತ ಹೆಚ್ಚು ರಾಷ್ಟ್ರಗಳ ನಡುವೆ ನಿಕಟವಾದ ವ್ಯಾಪಾರದ ನಂಟು ಬೆಸೆಯುವ ದೊಡ್ಡ ಕನಸನ್ನು ಚೀನಾ ಹೊಂದಿದೆ. ಇದರ ಭೌಗೋಳಿಕ ವ್ಯಾಪ್ತಿಯಷ್ಟೇ ದೊಡ್ಡದು ಇದರ ಕಾಲಾವಧಿ. ೨೦೪೯ರಲ್ಲಿ ಯೋಜನೆ ಪೂರ್ಣಗೊಳಿಸುವ ಗುರಿ ಚೀನಾದ್ದು.

ಈ ಯೋಜನೆ ಚೀನಾದ ವಿದೇಶಾಂಗ ನೀತಿಗೆ ಎಷ್ಟು ಮುಖ್ಯವೆಂದರೆ, ೨೦೧೭ರಲ್ಲಿ ಯೋಜನೆಯ ಅನುಷ್ಠಾನದ ಗುರಿಯನ್ನು ಸಂವಿಧಾನದಲ್ಲಿ ಅಳವಡಿಸಲಾಯಿತು. ೨೦೪೯ರೊಳಗೆ ಸರಕಾರದಲ್ಲಿ ಏನೇ ಬದಲಾವಣೆಗಳಾದರೂ ಯೋಜನೆಯ ಅನುಷ್ಠಾನದಲ್ಲಿ ವ್ಯತ್ಯಯ ಉಂಟಾಗದು.

ಈ ಯೋಜನೆಯ ಹಿಂದಿರುವ ಚೀನಾದ ಮಹತ್ವಾಕಾಂಕ್ಷೆ ಏನು? ನಮ್ಮ ನೆರೆಯ ಪಾಕಿಸ್ತಾನ, ಶ್ರೀಲಂಕದಿಂದ ಮೊದಲುಗೊಂಡು ದೂರದ ಆಫ್ರಿಕಾ ಖಂಡದ ದೇಶಗಳು ಸೇರಿದಂತೆ ಇದರಲ್ಲಿ ಪಾಲುಗೊಂಡಿರುವ ರಾಷ್ಟ್ರಗಳ ಭವಿಷ್ಯವೇನು? ಭಾರತ, ಜಪಾನ್ ಸೇರಿದಂತೆ ಅನೇಕ ರಾಷ್ಟ್ರಗಳು ಈ ಯೋಜನೆಯನ್ನು ವಿರೋಧಿಸುತ್ತಿರುವುದೇಕೆ? ಇವೇ ಮೊದಲಾದ ಕುತೂಹಲಕಾರಿ ಅಂಶಗಳನ್ನು ವಿವರವಾಗಿ ಚರ್ಚಿಸುವ ಪೋರ್ಚುಗೀಸ್ ಲೇಖಕ ಬ್ರುನೋ ಮಶೆಸ್ ರ ಪುಸ್ತಕ "ಬೆಲ್ಟ್ ಅಂಡ್ ರೋಡ್, ಎ ಚೈನೀಸ್ ವರ್ಲ್ಡ್ ಆರ್ಡರ್" ಕುರಿತ ಚರ್ಚೆ ಅರಳಿಕಟ್ಟೆಯ ನಲವತ್ತೆರಡನೆಯ ಸಂಚಿಕೆಯಲ್ಲಿ...

Recording date: 8 November 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ಸೈಕ್ಲಿಂಗ್ ಅನ್ನುವುದು ಇತ್ತೀಚಿಗೆ ಭಾರತದಲ್ಲಿ ಅದರಲ್ಲೂ ನಗರಪ್ರದೇಶಗಳಲ್ಲಿ ಹೆಚ್ಚುತ್ತಿರುವ ಒಂದು ಟ್ರೆಂಡ್. ಸೈಕ್ಲಿಂಗ್ ಅನ್ನುವುದು ಸಮಾನಮನಸ್ಕರೊಡನೆ ಸುತ್ತಾಡುವ ಒಂದು ಪ್ರಕ್ರಿಯೆ ಮಾತ್ರವಾ ಅಥವಾ ತಮ್ಮನ್ನು ತಾವು ಅರಿತುಕೊಳ್ಳಲು ಇರುವ ಸಾಧನವಾ?

ಸೈಕ್ಲಿಂಗ್ ಹೆಚ್ಚಾಗಿ ನಮ್ಮ ದೈಹಿಕ ಸಾಮರ್ಥ್ಯ ಬೇಡುತ್ತದಾ ಅಥವಾ ಮಾನಸಿಕ ಶಕ್ತಿ ಹೆಚ್ಚು ಮುಖ್ಯವಾ? ಸೈಕಲ್ ಸವಾರರು ಬೇರೆ ಬೇರೆ ಛಾಲೆಂಜುಗಳಿಗೆ ತಮ್ಮನ್ನು ಹೇಗೆ ಒಡ್ಡಿಕೊಳ್ಳುತ್ತಾರೆ? ದಿನಗಟ್ಟಲೆ ಸೈಕಲ್ ಪ್ರಯಾಣ ಮಾಡುವಾಗ ಉಂಟಾಗುವ ಅಡೆತಡೆಗಳೇನು, ಅದಕ್ಕಾಗಿ ಹೇಗೆ ತಮ್ಮನ್ನು ತಾವು ತಯಾರಿ ಮಾಡಿಕೊಳ್ಳುತ್ತಾರೆ? ಹೀಗೆ ಹತ್ತು ಹಲವಾರು ವಿಷಯಗಳ ಬಗ್ಗೆ ಮಂಜುಳಾ ಹಾಗು ನೇತ್ರ ಜೊತೆ ನಾವು ನಡೆಸಿದ ಅಪರೂಪದ ಮಾತುಕತೆ ಅರಳಿಕಟ್ಟೆಯ ನಲವತ್ತೊಂದನೆಯ ಸಂಚಿಕೆಯಲ್ಲಿ.

ಇನ್ನಷ್ಟು ಆಸಕ್ತಿಕರವಾದ ಚರ್ಚೆಗಳನ್ನು ಕನ್ನಡದಲ್ಲಿ ಕಟ್ಟಿಕೊಡಲು ನಿಮ್ಮ ಬೆಂಬಲ ಅತ್ಯಗತ್ಯ. ಯುಟ್ಯೂಬಿನಲ್ಲಿ ನಮ್ಮ ಚಾನೆಲ್ ಗೆ ಸಬ್ ಸ್ಕ್ರೈಬ್ ಮಾಡಿ ಇದರಿಂದ ನಾವು ನಿಮ್ಮಂತಹ ಇನ್ನಷ್ಟು ಕೇಳುಗರನ್ನು ತಲುಪಲು ನೆರವಾಗುತ್ತದೆ.

Recording date: 2 November 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ಅರಳಿಕಟ್ಟೆಯ ಸಮಸ್ತ ಕೇಳುಗರಿಗೆ ಹಾಗೂ ವೀಕ್ಷಕರಿಗೆ ಹೊಸ ವರ್ಷದ ಶುಭಾಶಯಗಳು. ೨೦೨೧ ನಿಮ್ಮೆಲ್ಲ ಕನಸುಗಳನ್ನು ನನಸಾಗಿಸಲಿ ಎಂದು ಹಾರೈಸುತ್ತೇವೆ.

ಧಾರ್ಮಿಕ ಮೂಲಭೂತವಾದಿಗಳು, ದಮನಕಾರಿ ಸರಕಾರಗಳು ಖಾಸಗಿ ವ್ಯಕ್ತಿಗಳ ವಾಕ್ ಸ್ವಾತಂತ್ರ್ಯವನ್ನು ಹತ್ತಿಕ್ಕುವುದರ ಉದಾಹರಣೆಗಳನ್ನು ನಾವು ಸಾಕಷ್ಟು ಕಂಡಿರುತ್ತೇವೆ. ಜಾತಿ ದ್ವೇಷದ ಹೆಸರಿನಲ್ಲಿ ಕುಟುಂಬಗಳನ್ನು ಬಹಿಷ್ಕಾರ ಹಾಕುವ ಅವರೊಂದಿಗೆ ಎಲ್ಲಾ ಬಗೆಯ ಸಾಮಾಜಿಕ ನಂಟನ್ನು ಕಡಿದುಕೊಳ್ಳುವ ಪದ್ಧತಿ ಹಲವು ಹಳ್ಳಿಗಳಲ್ಲಿ ಜಾರಿಯಲ್ಲಿರುವುದನ್ನು ನಾವು ಕೇಳಿ ತಿಳಿದಿರುತ್ತೇವೆ.

ಆದರೆ ಅಮೆರಿಕಾದಿಂದ ಮೊದಲಾಗಿ ಅನೇಕ ಪಾಶ್ಬಿಮಾತ್ಯ ವಿಶ್ವವಿದ್ಯಾಲಯಗಳಲ್ಲಿ ಗುರುತಿಸಲಾಗಿರುವ ಕ್ಯಾನ್ಸಲ್ ಕಲ್ಚರ್ ಎಂಬ ಹೊಸತೊಂದು ಬಗೆಯ ದಮನಕಾರಿ ಸಂಸ್ಕೃತಿಯ ಬಗ್ಗೆ ನಿಮಗೆಷ್ಟು ಗೊತ್ತು? ಈ ಸಂಸ್ಕೃತಿಯು ವಿಶ್ವವೇ ಕೊಂಡಾಡುವ ಮಹಾತ್ಮ ಗಾಂಧಿಯ ಪ್ರತಿಮೆಯನ್ನು ತೆರವು ಗೊಳಿಸಬೇಕು ಎಂದು ಪಟ್ಟು ಹಿಡಿಯುತ್ತದೆ, ಎರಡನೆಯ ವಿಶ್ವಯುದ್ಧದಲ್ಲಿ ನಾಜಿ ಜರ್ಮನಿಯ ವಿರುದ್ಧ ಬ್ರಿಟನ್ನನ್ನು ವಿಜಯದೆಡೆಗೆ ಮುನ್ನಡೆಸಿದ ನಾಯಕ ವಿನ್ಸ್ಟನ್ ಚರ್ಚಿಲ್ ಗೆ ಮನ್ನಣೆ ಕೊಡಬಾರದು ಎಂದು ಸಮರ್ಥಿಸುತ್ತದೆ. ಈ ಸಂಸ್ಕೃತಿಯ ಹರಿಕಾರರ ಕೋಪಕ್ಕೆ ಗುರಿಯಾದರೆ ಒಂದು ಸಣ್ಣ ತಪ್ಪಿಗೆ, ಕ್ಷಣಾರ್ಧದಲ್ಲಿ ವರ್ಷಗಳಿಂದ ಕಟ್ಟಿಕೊಂಡ ಕರಿಯರ್ ಸರ್ವನಾಶವಾಗಿ ಹೋಗುತ್ತದೆ.

ಇಂತಹ ವಿಲಕ್ಷಣವಾದ ಸಂಸ್ಕೃತಿ ಬೆಳೆಯಲು ಕಾರಣವಾದ ಅಂಶಗಳೇನು, ಇದು ಜನಪ್ರಿಯವಾಗುವಕ್ಕೆ ಇರುವ ಮನಃಶಾಸ್ತ್ರೀಯ ಕಾರಣಗಳು ಯಾವುವು? ಕ್ಯಾನ್ಸಲ್ ಸಂಸ್ಕೃತಿಯಲ್ಲಿ ತೊಡಗಿದವರು ತಾವು ಮಾಡುವುದೆಲ್ಲ ಉತ್ತಮ ಸಮಾಜದ ನಿರ್ಮಾಣಕ್ಕಾಗಿ ಎಂದು ಪ್ರಾಮಾಣಿಕವಾಗಿ ನಂಬಿಕೊಂಡಿದ್ದರೂ ಅದರಿಂದ ತಮಗೆ ಹಾಗೂ ಸುತ್ತಲಿನ ಸಮಾಜದಲ್ಲಿ ಆಗುವ ಅನಾಹುತಗಳೇನು ಎನ್ನುವ ಕುತೂಹಲಕಾರಿ ಪ್ರಶ್ನೆಗಳನ್ನೆತ್ತಿಕೊಂಡು ನಾವು ನಡೆಸಿದ ಚರ್ಚೆ ಅರಳಿಕಟ್ಟೆಯ ನಲವತ್ತನೆಯ ಸಂಚಿಕೆಯಲ್ಲಿ ನಿಮ್ಮ ಮುಂದಿದೆ.

ಇನ್ನಷ್ಟು ಆಸಕ್ತಿಕರವಾದ ಚರ್ಚೆಗಳನ್ನು ಕನ್ನಡದಲ್ಲಿ ಕಟ್ಟಿಕೊಡಲು ನಿಮ್ಮ ಬೆಂಬಲ ಅತ್ಯಗತ್ಯ. ಯುಟ್ಯೂಬಿನಲ್ಲಿ ನಮ್ಮ ಚಾನೆಲ್ ಗೆ ಸಬ್ ಸ್ಕ್ರೈಬ್ ಮಾಡಿ ಇದರಿಂದ ನಾವು ನಿಮ್ಮಂತಹ ಇನ್ನಷ್ಟು ಕೇಳುಗರನ್ನು ತಲುಪಲು ನೆರವಾಗುತ್ತದೆ.

ಈ ಸಂಚಿಕೆಯಲ್ಲಿ ಉಲ್ಲೇಖಿಸಿದ ವಿಚಾರಗಳ ಕುರಿತ ಮಾಹಿತಿ:

- Mental models to understand the world Part 1: https://www.youtube.com/watch?v=C8FfMHzJ2ro

- Mental models to understand th world part 2: https://www.youtube.com/watch?v=oCiikEgeIAQ

- Thomas Sowell's book - A conflict of visions : https://www.youtube.com/watch?v=COTkCUs0WKY

- Yuval Noah Hariri's book Sapiens : https://www.youtube.com/watch?v=qaS7dvhNlis

Recording date: 04 October 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ವರನಟ ರಾಜಕುಮಾರ್ ವೀರಪ್ಪನ್ ಸೆರೆಯಿಂದ ಬಿಡುಗಡೆಯಾದ ಸಂದರ್ಭದಲ್ಲಿ ಅವರನ್ನು ಭೇಟಿಯಾದ ತೆಲುಗಿನ ಖ್ಯಾತ ನಟ ಅಕ್ಕಿನೇನಿ ನಾಗೇಶ್ವರರಾವ್ ಬಳಿ ಬೈಟ್ ಪಡೆದ ಪತ್ರಕರ್ತರೊಬ್ಬರು "ನಿಮ್ಮ ಹೆಸರು ಹಾಗೂ ವೃತ್ತಿಯೇನು ಸರ್?" ಎಂದು ಕೇಳಿದ್ದರು. ಇತ್ತೀಚೆಗೆ ಪ್ರತಿಭಟನೆಯೊಂದನ್ನು ವರದಿ ಮಾಡಲು ಇತಿಹಾಸಕಾರ ರಾಮಚಂದ್ರ ಗುಹಾರನ್ನು ಸಂದರ್ಶಿಸಿದ ಪತ್ರಕರ್ತೆ "ನೀವು ಯಾರು ಸರ್?" ಎಂದು ಮುಗ್ಧವಾಗಿ ಪ್ರಶ್ನಿಸಿದ್ದಳು. ಸುದ್ದಿಮನೆಯಲ್ಲಿ ಕೆಲಸ ಮಾಡುವ ಪತ್ರಕರ್ತರು ಬೈಟ್ ಸಂಗ್ರಹಿಸುವ ನೌಕರರಾಗಿ ಕುಗ್ಗಿ ಹೋಗಿರುವುದು ಇಂದು ನಿನ್ನೆಯ ಬೆಳವಣಿಗೆಯೇನು ಅಲ್ಲ.

ಇಂಥದ್ದೇ ಹತ್ತು ಹಲವು ರಸಭರಿತ ಒಳನೋಟಗಳುಳ್ಳ ಹಿರಿಯ ಪತ್ರಕರ್ತ ಸತೀಶ್.ಡಿ.ಪಿ ಜತೆ ಅರಳಿಕಟ್ಟೆ ನಡೆಸಿದ ಚರ್ಚೆಯ ಎರಡನೆಯ ಹಾಗೂ ಅಂತಿಮ ಭಾಗ ಮುವತ್ತೊಂಭತ್ತನೆಯ ಸಂಚಿಕೆಯಲ್ಲಿ ನಿಮ್ಮ ಮುಂದಿದೆ.

Recording date: 25 October 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ಸರಕಾರ ತಮ್ಮನ್ನು ನಿಯಂತ್ರಿಸಬಾರದು ಎಂದು ಟಿವಿ ಚಾನೆಲ್ಲುಗಳು ಸ್ವಯಂ ನಿಯಂತ್ರಣದ ವ್ಯವಸ್ಥೆಯೊಂದನ್ನು ಹೊಂದಿವೆ. ಜನ ಸಾಮಾನ್ಯರು ಈ ಮಾಧ್ಯಮಗಳ ವಿರುದ್ಧ ದೂರು ದಾಖಲಿಸಲು ಈ ವ್ಯವಸ್ಥೆ ಅನುಕೂಲ ಮಾಡಿಕೊಡುತ್ತದೆ ಎಂಬುದು ನಿಮಗೆ ತಿಳಿದಿದೆಯೇ? ನಾವು ಓದುವ ದಿನಪತ್ರಿಕೆಯೊಂದನ್ನು ಮುದ್ರಿಸಿ ಹಂಚುವುದಕ್ಕೆ ಎಷ್ಟು ಹಣ ಖರ್ಚಾಗುತ್ತದೆ, ಇದಕ್ಕೆ ಬೇಕಾದ ಬಂಡವಾಳವನ್ನು ಪತ್ರಿಕೆಗಳು ಹೇಗೆ ಹೊಂದಿಸುತ್ತವೆ ಎನ್ನುವುದು ನಿಮಗೆ ಗೊತ್ತೆ? ನಮ್ಮ ನೆರೆಯ ರಾಷ್ಟ್ರಗಳಾದ ಪಾಕಿಸ್ತಾನ, ಶ್ರೀಲಂಕಾಗಳಲ್ಲಿ ಸುದ್ದಿ ಪತ್ರಿಕೆಗಳ ಮುಖಬೆಲೆ ಭಾರತದ ಪತ್ರಿಕೆಗಳಿಗಿಂತ ಎರಡು ಮೂರು ಪಟ್ಟು ಹೆಚ್ಚು ಎನ್ನುವುದು ನಿಮಗೆ ತಿಳಿದಿದೆಯೇ?

ಈ ವಾರದ ಸಂಚಿಕೆಯಲ್ಲಿ ನಾವು ಪತ್ರಿಕೋದ್ಯಮದಲ್ಲಿ ಇಪ್ಪತ್ಮೂರು ವರ್ಷ ವ್ಯಯಿಸಿ ಅಪಾರವಾದ ಅನುಭವ ಗಳಿಸಿರುವ ಕನ್ನಡಿಗ ಡಿ.ಪಿ.ಸತೀಶ್ ರೊಂದಿಗೆ ಭಾರತದಲ್ಲಿ ಪತ್ರಿಕೋದ್ಯಮಕ್ಕೆ ಇರುವ ಭವಿಷ್ಯದ ಕುರಿತು ಅನೇಕ ಕುತೂಹಲಕರವಾದ ವಿಷಯಗಳನ್ನು ಚರ್ಚಿಸಿದ್ದೇವೆ.

Recording date: 25 October 2020

Credits: Music: Crescents by Ketsa Licensed under creative commons. Icon made by Freepik from www.flaticon.com

ದಿನನಿತ್ಯದ ಸಾಮಾನ್ಯ ಬದುಕಿನಿಂದ ತೊಡಗಿ, ವ್ಯಾಪಾರಿಗಳು, ದೇಣಿಗೆ ಸಂಗ್ರಹಿಸುವ ಸರಕಾರೇತರ ಸಂಸ್ಥೆಗಳು, ರಾಜಕೀಯ ಪಕ್ಷಗಳು ಹೀಗೆ ಅನೇಕರು ಬಳಸುವ ಮನವೊಲಿಸುವ ತಂತ್ರಗಳನ್ನು ಕುರಿತು ಸುದೀರ್ಘವಾಗಿ ಸಂಶೋಧನೆ ನಡೆಸಿ ಡಾ. ರಾಬರ್ಟ್ ಚಲ್ದಿನಿ ಬರೆದ ಪುಸ್ತಕ ಇನ್ಫ್ಲುಯೆನ್ಸ್ (Influence, the psychology of persuasion) ಕುರಿತ ಚರ್ಚೆಯ ಎರಡನೆಯ ಹಾಗೂ ಅಂತಿಮ ಭಾಗ ಮುವತ್ತೇಳನೆಯ ಸಂಚಿಕೆಯಲ್ಲಿ ನಿಮ್ಮ ಮುಂದಿದೆ. ಚರ್ಚೆಯಲ್ಲಿ ಭಾಗವಹಿಸಿದವರು ಮುಕುಂದ್ ರಂಗ ಸೆತ್ಲೂರ್, ಸುಪ್ರೀತ್ ಕೆ ಎಸ್ ಹಾಗೂ ವಾಸುಕಿ ರಾಘವನ್.

ಅಬ್ಬರವಿಲ್ಲದ, ಗಹನವಾದ ವಿಷಯಗಳ ಬಗೆಗಿನ ಮಾತುಕತೆ ನಿಮಗಿಷ್ಟವಾದರೆ ನಮ್ಮ ಯುಟ್ಯೂಬ್ ಚಾನೆಲ್ ಗೆ ಚಂದಾದಾರರಾಗಿ ನಮ್ಮನ್ನು ಬೆಂಬಲಿಸಿ.

Recording date: 20 September 2020

Credits: Music: Crescents by Ketsa Licensed under creative commons. Icon made by Freepik from www.flaticon.com