L'emissiun Artg musical vegn extendida davent il settember sin duas uras. Mintga dumengia suentermezdi da las 14:00 fin las 16:00 pudais vus tadlar musica da differents geners, registrada da RTR.

Suenter 38 onns emissiuns da musica tar RTR è il redactur e producent da musica Giusep Giuanin Decurtins ì en pensiun bain meritada. Ses successur, Hugo Schär, preschenta en ses emprim Artg musical las pitschnas midadas che l'emissiun survegn. L'emissiun vegn extendida sin duas uras la dumengia suentermezdi. Il cuntegn resta dentant pli u main il medem sco fin qua. L'emissiun Artg musical duai esser e restar in caleidoscop da tut quai che capita en la scena da musica en Svizra rumantscha, en il Grischun e sur ils cunfins da noss chantun. L'Artg musical vul era restar datiers da musicistas e musicists rumantschs, saja quai da professiun u laics, ed adina puspè preschentar lur novas registraziuns e represchentaziuns.