08/01/2018 AUTOMAG BMW X3 (11h5    0)
P. ORIGER
_____________________________________________________
USO: Am Automag vun haut teste mer een neie BMW SUV, an zwar den X3 an deen ass entretemps schonn an der drëtter Generatioun ukomm!

Paul, a BMW follegt dem allgemengen Trend an huet den X3 och nees e Stéck wuesse geloss!
Richteg an dat kënnt net vun ongeféier; den neien X3 steet nämlech op der Plattform CLAR - Cluster Architecture an déi gëtt och fir de 5er an de 7er agesat. Vu baussen gesäit ee fläit net direkt en Ennerscheed zum Virgänger, ausser fläit e puer optësch Détailer, mee bei den Zuele mierkt een et: ronn 7 cm huet en an der Längt an annerhalwen cm an der Héicht an an der Breet zougeluecht, virun allem de Radstand 5 cm gestreckt.

An dat mierkt een dann wahrscheinlech bannenan?
Absolut. Ech muss éierlech soen dat ech als éischt geduecht hunn, ech séiz an engem X5. U Plaz feelt et wierklech net; den X3 ass vir immens lëfteg, besonnesch no uewen ass bei mir nach e gefillten halwe Meter Sputt, op der Réckbänk ass zwar Plaz, et gouf awer Kloen iwwert de Sëtzconfort, deelweis ass se haart a si kéint wéinstens esou gutt konturéiert sinn wéi déi viischt Sëtzer. Wëll déi hu wierklech BMW-typesch erem gepasst wéi e Costume op Moss. Sou dat ech emol spontan den Aller-Retour op Hamburg gemaach hunn ouni herno grouss Réckeproblemer ze hunn. Iwwerhapt ass den X3 gemaach fir laang Reesen; sämtlech Fuergeräischer goufe gutt ewechisoléiert, de risege Panoramadaach suergt fir eng Wuelfillatmosfär a mat der SUV-typesch héigher Sëtzpositioun huet een e gutt Fuergefill. An och ouni Loftfiederung rullt den X3 confortabel iwwer schlecht Bunnen. Eeenzeg beim Manövréieren an enke Parkhaiser oder a schmuele Garagen ass dem X3 säi gewuessene Gabarit scho problematesch. Dofir daacht d’Mall eppes; 550 Liter ass se grouss an de Rollo léisst sech ennert dem Buedem verstauen. En plus ass de Banneraum vollgestoppt mat prakteschen Oflagen – hei gouf matgeduecht!

Den X3 kënnt séngem grousse Brudder also geféierlech no!
Dat op jidde Fall, den Interieur gesäit edel aus an ass gutt verschafft, zemols mat den Equipementer aus 5er a 7er kënnt deementspriechend Luxus an d’Bud – virausgesat natirlech, et huet ee bei den Optioune fläisseg Kräizer gemaach. Den Ecran steet fräi a gutt am Bléckfeld um Tableau an ass 10,2 Zoll grouss, léisst sech elo neierdéngs nierft dem i-Drive och als Touchscreen bedéngen. Déi digital Instrumenter sinn och vu 5er a 7er, genee wéi d’Gestesteierung. Bon, ech misst dat genee esou wéineg hunn wéi en Touchscreen; fir mech ass den i-Drive mat der Molett nach emmer e vun deene bäschte Systemer déi am mannsten oflenken.

Ech héieren et gëtt net vill ze meckeren, och net beim Fueren? Dat ass jo d’Paradediscipline vu BMW!
An dofir strecken ech do och emmer all méng Fühler aus. Ma och beim X3 hunn d’Bayern nees en Auto fäerdeg bruecht, deen trotz knapp 2 Tonnen liicht, handlech a wann ee wëll och dynamesch ze fueren ass. D’Motorisatioun vum Testauto war dee bis elo mol klengsten Diesel; am 20d stinn 190 PS zur Dispositioun an déi ginn am Fong duer. Och wann de Genéisser sech de 6-Zylinder wënscht, mam 4-Zylinder schwëmmt ee gutt mat, 400 Nm Dréihmoment si jo och net näischt. Eventuell bei Iwwerhuelmanöver op der Autobunn wier e bësse méi dann awer méi souverän. An och de Klang ass virun allem baussen onverkennbar Diesel. Tréischte kann ee sech mat eppes iwwer 7 Liter Verbrauch respektiv 9 vollbesat bei schwéierem Fouss op däitscher Autobunn, dat ass ok fir esou een Auto, och wann et wäit vun deene 5 aus dem Katalog ewech sinn. Gutt Note ginn et fir d’8-Gang-Automatik, si mécht de Match gutt; besonnesch am Sport-Modus geet dat viif a genee zum richtege Moment. Schued just dat eisen Test-X3 keng Paddel um Steier hat.

Da gouf wahrscheinlech genuch ugekräizt!
Wahrscheinlech! Mee bei engem Testwonpräis vu knapp 63500 Euro dierft dat scho mat dra sinn. Mee dat ass jo souwisou gewosst. Den X3 start bei 44.150 Euro, eisen Diesel kascht bal 3000 Euro Oppräis, de virleefegen Topdiesel a méng Idealmotorisatioun steet mat ronn 55.000 Euro an der Lëscht. A wéi emmer, ouni Optiounen! Interessant Info; den X5 start eréischt bei 55.650 Euro, do kann een also mol un d’Iwwerlee kommen.
A wann der ierch Fotoen oder d’Präislëschten vum neie VW Polo ukucke wëllt, da klickt ierch eran op auto.rtl.lu