Á morgun verða Bændasamtök Íslands með bókamarkað í andyrri Bændahallarinnar á Hótel Sögu.Þar verður að finna allskonar bækur og tímarit sem eru gömul og nýleg, jafnvel einhverjar gersemar frá því kringum aldamótin 1900. Guðrún Birna Brynjarsdóttir kom í þáttinn og tók með sér eitthvað af þessum gersemum og sagði okkur frá.

Það var mikið þrekvirki þegar Skátafélagið Væringjar í Reykjavík reisti veglegan útivistarskála við Lækjarbotna, austan Reykjavíkur og nú er þessi skáli 100 ára gamall. Þegar skálinn var reistur á sínum tíma, færði hann skátum aukna möguleika til útivistar, rötunar og leikja. Árið 1962 var skálinn fluttur á Árbæjarsafnið og stendur þar enn. Við skoðuðum skálann um helgina í fylgd Hauks Haraldssonar skáta á áttræðisaldri en hann á góðar minningar frá því hann steig fyrst inní skálann, þá 11.ára gamall.

Lesandi vikunnar í þetta sinn var Gagga Jónsdóttir. Hún er kvikmyndaframleiðandi, handritshöfundur og leikstjóri. Hún leikstýrði og var annar handritshöfunda kvikmyndarinnar Saumaklúbburinn sem er sýnd um þessar mundir í kvikmyndahúsum og svo var kynnt í síðustu viku að hún er í höfundateyminu sem semur næsta Áramótaskaup. Við fengum að vita hvaða bækur hún hefur verið að lesa undanfarið og hvaða bækur og höfundar hafa haft mest áhrif á hana í gegnum tíðina.

UMSJÓN GUÐRÚN GUNNARSDÓTTIR OG GUNNAR HANSSON