សមាជិកសភាអូស្ត្រាលីរិះគន់ ការចោទប្រកាន់បទឧក្រិដ្ឋលើអតីតសមាជិកអូស្ត្រាលី លោក ​ហុង លីម ថា ដើម្បីបំបិទសំឡេងរិះគន់ ជុំវិញការបង្ក្រាបរបស់លោក ហ៊ុន សែន ទៅលើសិទ្ធិមនុស្សនិងលទ្ធិប្រជាធិបតេយ្យ។​ លោក ហុង លីម ​ដែលរងការចោទប្រកាន់ពីតុលាការខ្មែរថា លោកចង់ឃើញរដ្ឋាភិបាលអូស្ត្រាលីអន្តរាគមន៍ឱ្យលុបចោលបទចោទប្រកាន់លើរូបលោក។

សាលាដំបូងរាជធានីភ្នំពេញបន្តជំនុំជម្រះសំណុំរឿងរបស់លោក រ៉ុង ឈុន និងសកម្មជនពីរនាក់ទៀត នៅព្រឹកថ្ងៃទី៣ ខែកុម្ភៈ។ ជាមួយគ្នានេះអាជ្ញាធរបានដាក់ពង្រាយកងកម្លាំងជាច្រើននាក់ ទប់ស្កាត់មិនឱ្យប្រជាពលរដ្ឋចូលទៅឈរតាមដាននៅមុខតុលាការឡើយ។ មន្ត្រីសិទ្ធិមនុស្ស ចាត់ទុករឿងនេះថា ជាការរំលោភសិទ្ធិសេរីភាពការជួបជុំរបស់ប្រជាពលរដ្ឋ។

ក្រុមអ្នកតាមដានស្ថានការណ៍កម្ពុជាវាយតម្លៃថា បទបញ្ជារបស់លោក ហ៊ុន សែន មិនឱ្យឆ្លើយឆ្លងជាមួយគណបក្សប្រឆាំងនោះ នឹងគ្មានប្រសិទ្ធភាពឡើយ ពីព្រោះការមិនតបតនេះ ធ្វើឱ្យពលរដ្ឋបាត់បង់ការជឿជាក់លើរដ្ឋាភិបាល។ ម្យ៉ាងវិញទៀត សូម្បីតែលោក ហ៊ុន សែន ខ្លួនឯងផ្ទាល់ លោកក៏នៅឆ្លើយតបជាមួយគណបក្សប្រឆាំងម្តងម្កាលដែរ។

ការលើកឡើងបែបនេះ គឺនៅបន្ទាប់ពីលោក ហ៊ុន សែន បានហាមឃាត់មន្ត្រី និងប្រព័ន្ធឃោសនារបស់លោក ឱ្យឈប់ឆ្លើយតប និងឈប់ពិភាក្សារាល់បញ្ហាទាំងឡាយណាដែលពាក់ព័ន្ធនឹងគណបក្សសង្គ្រោះជាតិ។

មន្ត្រីសង្គមស៊ីវិល និងអ្នកឃ្លាំមើលបរិស្ថាន យល់ថា យុវជនចលនាមាតាធម្មជាតិ បានបំពេញភារកិច្ចជាពលរដ្ឋល្អ រួមចំណែកជួយរដ្ឋាភិបាលច្រើន ក្នុងការឃ្លាំមើល និងការពារវិបត្តិបរិស្ថាន ដូច្នេះអាជ្ញាធររដ្ឋាភិបាល ពុំគួរចាប់ចងពួកគេនោះទេ។ ថ្មីៗនេះ អាជ្ញាធរខេត្តកំពត បានប្រកាសទទួលស្គាល់ ពីចំណុចខ្វះខាតមួយចំនួនទាក់ទិនការបង្ហូរទឹកលូ ចូលព្រែកកំពត ហើយអាជ្ញាធរកំពុងចាត់វិធានការដោះស្រាយ ក្រោយការបង្ហោះវីដេអូរិះគន់របស់យុវជនចលនាមាតាធម្មជាតិ។

អ្នកលេងហ្វេសប៊ុក (Facebook) មួយចំនួន បានសម្ដែងមតិចាប់អារម្មណ៍នឹងការធ្វើរដ្ឋប្រហារយោធានៅប្រទេសភូមា ឬមីយ៉ាន់ម៉ា(Myanmar) និងបានលើកយករឿងនេះមកឆ្លុះបញ្ចាំងដល់មេដឹកនាំនៅកម្ពុជា។ អ្នកវិភាគនយោបាយ យល់ថា មតិរិះគន់របស់ពលរដ្ឋនេះ ធ្វើឡើងដោយសារពួកគាត់មិនពេញនឹងរបបដឹកនាំបែបផ្ដាច់ការ។

មន្ដ្រីជាន់ខ្ពស់រដ្ឋាភិបាល បញ្ជាឲ្យប៉ូលិសចរាចរណ៍ បន្តរឹតបន្តឹងអនុវត្ត ការផាកពិន័យធ្ងន់ធ្ងរ ចំពោះបទល្មើសចរាចរណ៍ ក្រោយពេលអត្រាគ្រោះថ្នាក់ អ្នករបួស និងអ្នកស្លាប់ នៅឆ្នាំ២០២០បានធ្លាក់ចុះ។ អ្នកជំនាញ និងពលរដ្ឋខ្លះ សាទរការរឹតបន្តឹងច្បាប់ តែបន្តសំណូមពរឲ្យមានការបន្ធូរបន្ថយការផាកពិន័យ។

មេឃុំគណបក្សកាន់អំណាចម្នាក់ នៅខេត្តស្ទឹងត្រែងរងការចោទថា បានឃុបឃិតលក់ដីព្រៃសាធារណៈរបស់រដ្ឋ និងព្រៃអភិរក្សដោយខុសច្បាប់អស់ជាច្រើនហិកតារ ក្រោមលេសផ្តល់ដីសម្បទានសង្គមកិច្ច។ ការចោទប្រកាន់នេះធ្វើឡើងក្រោយពីដីព្រៃសាធារណៈរបស់រដ្ឋ និងដែនជម្រកសត្វព្រៃឡង់ នៅតែទទួលរងការឈូសឆាយទន្ទ្រាន ជាកម្មសិទ្ធិអស់ជិត ៤ពាន់ហិកតារជាថ្មីទៀត។

ពលករ​ខ្មែរ​ធ្វើ​ការ​នៅ​ប្រទេស​ថៃ​ជា​ច្រើន​នាក់​បាន​ចាញ់​បោក​មេខ្យល់​ធ្វើ​ឯកសារ​​ក្លែងក្លាយ​ ​និង​ខ្លះ​ទៀត​ត្រូវ​បាន​ថៅកែ​ថៃ​ដក​ហូត​លិខិត​ឆ្លងដែន​។ ​​ពួកគាត់​ព្រួយបារម្ភ​ខ្លាច​​​​​​​ក្លាយ​ជា​ពលករ​ខុស​ច្បាប់​នៅ​ពេល​ខាង​មុខ ហើយ​ត្រូវ​អាជ្ញាធរ​ថៃ​ចាប់​បញ្ជូន​ទៅ​កម្ពុជា​វិញ​​។ អ្នក​ការពារ​សិទ្ធិ​ពលករ​ យល់​ថា ​​​​​មាន​ពលករ​ខ្មែរ​រាប់​សែន​នាក់​​អាច​នឹង​ក្លាយ​ជា​ពលករ​ខុស​ច្បាប់​នៅ​ចុង​ខែ​កុម្ភៈ​ខាង​មុខ។

សាច់ញាតិយុវជនមាតាធម្មជាតិ និងយុវជនខ្មែរថាវរៈ បួងសួងនៅមុខព្រះអង្គទេព នៅខេត្តសៀមរាប ដើម្បីសុំឲ្យតុលាការដោះលែងក្រុមគ្រួសារពួកគេឲ្យមានសេរីភាពឡើងវិញ។ មន្ត្រីសិទ្ធិមនុស្សយល់ថា នេះជាសិទ្ធិរបស់ពួកគេ ដែលជឿជាក់លើវត្ថុស័ក្តិសិទ្ធថា នឹងអាចជួយឲ្យសាច់ញាតិរបស់ពួកគេមានសេរីភាពឆាប់ៗ។

អាជ្ញាធរខេត្តកំពត ទទួលស្គាល់ថា បញ្ហាខ្វះប្រព័ន្ធលូ និងអាងចម្រោះទឹក កំពុងក្លាយជាបញ្ហាប្រឈមចម្បង ប៉ះពាល់ដល់បរិស្ថានទឹកសមុទ្រ ហើយអាជ្ញាធរជំនាញ កំពុងដោះស្រាយរឿងនេះ។

ក៏ប៉ុន្តែអ្នកឃ្លាំមើលបរិស្ថាន នៅមិនទាន់ជឿចំពោះការលើកឡើងនេះទេ ព្រោះអាជ្ញាធរខេត្តនេះ តែងតែសន្យាខ្យល់។