ពេលព្រឹក

ឯកអគ្គរដ្ឋទូតសហរដ្ឋអាមេរិក ចេញមុខរិះគន់ចំៗចំពោះអាជ្ញាធរកម្ពុជា ដែលផ្អឹបទុកសំណុំរឿងមេបក្សប្រឆាំង លោក កឹម សុខា ដោយមិនកំណត់ពេលសវនាការ។ មន្ត្រីរបបក្រុងភ្នំពេញឆ្លើយតបថា នេះជាសំណុំរឿងឧក្រិដ្ឋ ដែលមិនអាចជម្រះក្នុងរយៈពេលខ្លីបាននោះទេ។ អ្នកវិភាគជំរុញឱ្យរដ្ឋាភិបាលឆ្លើយតបជាវិជ្ជមានចំពោះកង្វល់របស់សហរដ្ឋអាមេរិក ដើម្បីបញ្ចៀសទណ្ឌកម្មទាំងឡាយនៅពេលខាងមុខ។

សាលាដំបូងរាជធានីភ្នំពេញ បន្តបើកសវនាការជំនុំជម្រះក្ដីលើសកម្មជនគណបក្សប្រឆាំង ក្នុងសំណុំរឿងរួមគំនិតក្បត់និងញុះញង់ នៅថ្ងៃទី២៨ មករានេះ ក្រោមបរិយាកាសរឹតបន្តឹងសន្តិសុខ និងរឹតត្បិតសិទ្ធិសេរីភាពពលរដ្ឋ។ មេធាវីការពារក្ដីនិងមន្រ្តីសង្គមស៊ីវិល លើកឡើងថា តុលាការព្យាយាមលើកយកការបង្ហោះហ្វេសប៊ុក ឈ្មោះហ្វេសប៊ុក និងសារឆ្លើយតាមបណ្ដាញសង្គមរបស់សកម្មជនបក្សប្រឆាំងធ្វើជាដើមចមនៃការចោទប្រកាន់លើកម្មជនបក្សប្រឆាំងទាំងនោះ។

មន្ដ្រីអង្គការតម្លាភាព ថាការបរិច្ចាគប្រាក់ខែរបស់មន្ដ្រីរាជការ ទោះក្នុងកាយវិការមនុស្សធម៌ ដើម្បីជួយដោះស្រាយវិបត្តិសង្គមក៏ដោយ ក៏ធ្វើឲ្យមានការមន្ទិល អំពីទំនាស់ផលប្រយោជន៍។ ការយល់ឃើញរបស់មន្ដ្រីអង្គការសង្គមស៊ីវិលបែបនេះ ធ្វើឡើងស្របពេលដែលរលកនៃការបរិច្ចាគប្រាក់ខែ របស់មន្ដ្រីរាជការ ចាប់ផ្តើមកក្រើកឡើងសារជាថ្មីទៀត។

ក្រុមអ្នកតាមដានស្ថានការណ៍កម្ពុជា ជំរុញឱ្យរបបលោក ហ៊ុន សែន ប្រញាប់គិតគូរស្តារស្ថានភាពសិទ្ធិមនុស្ស និងប្រជាធិបតេយ្យ ឱ្យបានមុនការបោះឆ្នោតខាងមុខ ដើម្បីបញ្ចៀសទណ្ឌកម្មពីសហគមន៍អន្តរជាតិ។ ការអំពាវនាវបែបនេះ កើតមានឡើង បន្ទាប់ពីសហគមន៍អន្តរជាតិ ជាពិសេស សហភាពអឺរ៉ុប និងសហរដ្ឋអាមេរិក នៅតែបញ្ជាក់ជំហរចង់ឱ្យកម្ពុជាមានឯកភាពជាតិ និងដំណោះស្រាយវិបត្តិនយោបាយ ដើម្បីបន្តទទួលបានផលប្រយោជន៍ផ្នែកសេដ្ឋកិច្ច និងរក្សាទំនាក់ទំនងល្អជាមួយក្រុមប្រទេសប្រជាធិបតេយ្យទាំងនោះ។

ជនជាតិដើមភាគតិចព្នងជិត ២រយគ្រួសារ(១៧០) កំពុងស្វែងរកការជួយជ្រោមជ្រែង ពីអាជ្ញាធរ និង តុលាការ ដើម្បីឱ្យស្ថាប័នទាំងនេះ ជួយការពារដីព្រៃសហគមន៍ភូមិអណ្តូងក្រឡឹង ដែលកំពុងទទួលរងការរំលោភបំពាន ពីឈ្មួញមានអំណាច។ អ្នកភូមិត្អូញត្អែរថា ពួកគេពុំមានសមត្ថភាព ការពារព្រៃឈើនៅតំបន់នោះបានទេ ព្រោះឈ្មួញសុទ្ធតែជាអ្នកមានឥទ្ធិពល។

អាជ្ញាធររបបក្រុងភ្នំពេញចាប់ខ្លួនស្ត្រីថ្ងៃសុក្រ និងជាអ្នកគាំទ្រគណបក្សសង្គ្រោះជាតិម្នាក់នៅខេត្តត្បូងឃ្មុំ នៅព្រឹកថ្ងៃទី២៦មករានេះ ក្រោមបទចោទញុះញង់ ដែលអាជ្ញាធរកំពុងប្រើប្រាស់យ៉ាងពេញនិយម។ ប៉ុន្តែមន្ត្រីសង្គមស៊ីវិលចាត់ទុកការចាប់ខ្លួនទាំងនេះថា ជាការបំភិតបំភ័យ និងបំបិទបំពានច្បាប់ទៅលើសិទ្ធិសេរីភាពសម្ដែងមតិរបស់ប្រជាពលរដ្ឋ។

សាលាដំបូងរាជធានីភ្នំពេញ នៅថ្ងៃទី២៦ បានពន្យារពេលសវនាការសំណុំរឿង អ្នកវិភាគនយោបាយ លោក គឹម សុខ បទបរិហារកេរ្តិ៍ជាសាធារណៈ និង ញុះញង់ បង្កឲ្យមានភាពវឹកវរធ្ងន់ធ្ងរដល់សង្គម។ អ្នកឃ្លាំមើលសិទ្ធិមនុស្ស ជំរុញឲ្យតុលាការទម្លាក់បទចោទ ព្រោះការលើកឡើងកន្លងមកជាសេរីភាពសម្ដែងមតិរបស់ពលរដ្ឋ។

ពលករខ្មែរធ្វើការនៅប្រទេសថៃជាច្រើននាក់ ត្អូញត្អែថា ការដាច់ស្បៀងអាហារ កំពុងក្លាយជាក្តីបារម្ភធំធេងសម្រាប់ពួកគាត់ ដោយសារពួកគាត់ អត់ការងារធ្វើជាច្រើនថ្ងៃមកហើយ បណ្ដាលមកពីការរាតត្បាតជំងឺកូវីដ១៩ចូលក្នុងសហគមន៍ជាលើកទី២។ ពលករខ្លះ នាំគ្នាដើរដាក់មងតាមប្រឡាយទឹកយកត្រីធ្វើម្ហូប និងខ្លះទៀតស៊ីឈ្នួលជម្រះស្មៅឱ្យជនជាតិថៃ បានប្រាក់បន្តិចបន្តួចដោះស្រាយជីវភាពប្រចាំថ្ងៃ។

ក្រសួងមហាផ្ទៃ សម្រេចបើកការស៊ើបអង្កេត ករណីស្នងការរងខេត្តតាកែវម្នាក់ ពីបទជំរិតទារប្រាក់ និង ដកហូតគ្រឿងអលង្ការរបស់ពលរដ្ឋ។ សង្គមស៊ីវិល គាំទ្រឲ្យមានការដាក់ទោសទណ្ឌ តាមច្បាប់ ក្រោយការស៊ើបអង្កេត ដឹងលទ្ធផលច្បាស់លាស់។