Hið árlega árveknis- og fjáröflunarátak Krabbameinsfélagsins Bleika slaufan hófst í vikunni. Slagorðið í ár er Sýnum lit, en Bleika slaufan er tileinkuð baráttunni gegn krabbameini hjá konum. Við fengum þær Ásdísi Ingólfsdóttur, framhaldsskólakennara og rithöfund, sem greindist með brjóstakrabbamein í tvígang með fimm ára millibili, og Höllu Þorvaldsdóttur, framkvæmdastjóra Krabbameinsfélagsins, í þáttinn til að fræða okkur um átakið í ár.

Matvendni hjá börnum er algeng og yfirleitt í hámarki á leikskólaaldri. Oft einskorðast fæðuvalið við fáar eða einhæfar fæðutegundir og skortir fjölbreytileika, ekki síst er varðar fjölda tegunda og magn af grænmeti og ávöxtum. Við töluðum við Berglindi Lilju Guðlaugsdóttur doktorsnema í Heilsueflingu í þættinum í dag en hún sagði okkur frá doktorsrannsókn sinni Bragðlaukaþjálfun: Fæðumiðuð íhlutun í leikskólum með þátttöku leikskólastarfsfólks og foreldra. Hún vann að svipaðri rannsókn meðal grunnskólabarna á yngsta stigi með Önnu Sigríði Ólafsdóttur prófessor í næringarfræði við Menntavísindasvið Háskóla Íslands. Niðurstöður þeirrar rannsóknar verða kynntar á Menntakvikudögum sem fara fram 6. og 7. október.

Alþjóðlegi geðheilbrigðisdagurinn er haldinn 10.október ár hvert víðsvegar um heiminn. Markmiðið er að vekja athygli á geðheilbrigðismálum, fræða almenning um geðrækt og geðsjúkdóma og sporna gegn fordómum í garð geðsjúkra. Við fengum þau Guðrúnu Stellu Ágústsdóttur og Orra Hilmarsson til að fræða okkur frekar um alþjóðlega geðheilbrigðisdaginn, en slagorð dagsins í ár er Geðheilbrigði að góðri heilsu.

Tónlist í þættinum í dag:

Er hann birtist / Hljómar (Gunnar Þórðarson og Þorsteinn Eggertsson)

Besame mucho / Cesaria Evora (Consuela Velazquez)

Harvest Moon / Krummi, KK, Ragnheiður Gröndal (Neil Young)

Lífið / Heiða Halls (Sigríður Heiða Hallsdóttir)

UMSJÓN: GUNNAR HANSSON OG GUÐRÚN GUNNARSDÓTTIR