16.janúar 1995 féll snjóflóð á þorpið í Súðavík á meðan flestir íbúar voru í fastasvefni. Í blindbyl og svartamyrkri hóf heimafólk að leita að sínum nánustu við hrikalegar aðstæður. Tveimur dögum seinna féll annað mannskætt snjóflóð á sveitabæinn Grund í Reykjhólasveit. Egill Fjeldsted sagnfræðingur skrifaði bókina Þrekvirki sem er nýkomin út. Hún er að stórum hluta byggð á viðtölum við 40 manns, sem annað hvort voru á heimilum sínum þegar flóðin skullu á þeim, eða tóku þátt í björgunarstörfum. Egill kom í þáttinn í dag og sagði okkur frá bókinni.

Ferðaþjónustufyrirtækið Your Friend in Reykjavik býður upp á skemmtilega jólagöngutúra nú í desember. Þetta er í annað árið í röð sem þessi ferð er í boði en í fyrra fór Valur Heiðar Sævarsson leiðsögumaður og eigandi ferðaþjónustufyrirtækisins ótroðnar slóðir og hélt vefgönguleiðsögn í beinni á netinu um miðbæ Reykjavíkur. Göngutúrinn vakti gífurlega lukku og fylgdust mörg þúsund manns víðs vegar að úr heiminum með streyminu. Í ár verður göngutúrinn með svipuðu sniði þar sem gestum er sagt frá íslenskum jólahefðum og jólahaldi. Við töluðum við Val Heiðar í þættinum.

Við hringdum í Einar Sveinbjörnsson veðurfræðing í þættinum og spurðum hann út í jólaveðrið. Verða rauð eða hvít jól? Hvernig hefur veðrið í haust og vetur verið í samanburði við önnur ár? Og hvað er hægt að sjá langt fram í tímann í veðurspám? Einar fræddi okkur um veðrið í þættinum í dag.

UMSJÓN GUÐRÚN GUNNARSDÓTTIR OG GUNNAR HANSSON