Dottie gee Wessel ʼn belangrike nuusleidraad oor die dwelmkartel. Kolwyntjie se nuwe voorkoms lok meer klandisie as wat Dottie en Slaptjip kan hanteer. Dottie is verheug, maar Slaptjip wantrou die man wat dit als veroorsaak het.

Wessel en Corlia vier die sukses van hul eerste paar uitsendings. Wanneer Corlia haar vir Wessel vervies, slaan Wolfgang toe en hy neem beheer oor terwyl Wessel magteloos moet toekyk.

Otto maak ʼn skokontdekking oor Windhond se vorige uitgawe en neem ingrypende besluite wat hy gaan berou.

Dottie en Slaptjip het baie te sê oor die eerste radio-uitsending. Dan daag die geheimsinnige Wolfgang Jordaan op en verander hul lewens in ʼn ommesientjie.

Corlia en Wessel het pas hul eerste uitsending voltooi en sy is ekstaties. Haar opwinding is van korte duur wanneer ʼn vreemde man skielik sy opwagting maak.

Otto en Elfra praat oor die dwelmstorie wat in vanoggend se Windhond gebreek het en hoe hy daaraan gekom het. Elfra is woedend vir Otto, maar hy hou vol hy was reg. Dit lei tot ʼn breekspul.

Slaptjip konfronteer Corlia met die feit dat hy ʼn komedie-aanbieding op hul radiostasie wil doen. Maar dan skiet hy homself in die voet. Die vete tussen Windhond se redakteur Otto en Briekaandraai FM se aanbieder Corlia raak heftiger.

Slaptjip vertel vir Dottie dat daar ʼn dwelmprobleem op die dorp is. Hy verdink sy neef Toffieneus dat hy deel van die dwelmnetwerk is. Dottie daag onverwags by die nuwe radiostasie op met haar beroemde “roebab-paai” en dit veroorsaak konsternasie op Briekaandraai FM se stasie.

Otto verwyt Elfra oor haar moontlike betrokkenheid by Briekaandraai FM. Elfra gaan soek troos by Dottie wat ook ʼn probleem het met Otto. Tesame maak hulle ʼn plan om weer sy guns te wen. “Die pad na ʼn man se hart loop deur sy maag.”

Wessel en Corlia oefen in die radio-ateljee vir hul eerste toetsuitsending. Wessel gebruik sy kanse en dinge raak te romanties na Corlia se sin.