Það er mikið talað um ástandið á húsnæðismarkaðinum og svona í ljósi þess kynntum við okkur Húsnæðissamvinnufélagið Búseta sem var stofnað árið 1983 með norrænar fyrirmyndir að leiðarljósi. Hvernig gengur að reka slíkt félag meðan húsnæðisverð er í hæstu hæðum? Búseti á rætur að rekja til þeirra sem voru í forsvari fyrir Leigjendasamtökin sem stofnuð voru 1978. Það eru einstaklingar sem áttu það sameiginlegt að hafa búið í Svíþjóð og höfðu kynnst sænska húsnæðiskerfinu og samtökum leigjenda. Við ræddum við framkvæmdastjóra félagsins, Bjarna Þór Þórólfsson í þættinum.

Síðustu mánuði hafa komið fréttir um dauða villta fugla víðs vegar um landið, einmitt þegar Covid var í rénun. Við sáum frétt á vef Skessuhorns.is þar sem fólki var ráðlagt hvað það ætti að gera ef það rekst á dauðan fugl, sem sagt leiðbeiningar frá MAST. Við könnuðum hver staðan er núna og fengum Brigitte Brugger, dýralækni hjá Matvælastofnun og sérfræðing í sjúkdómum alifugla, til þess að segja okkur frá stöðunni og einmitt hvað er best að gera í slíkum tilfellum. En það er sem sagt að tilkynna til MAST um slíkt: https://www.mast.is/is/abendingar-fyrirspurnir

Við fengum póstkort frá Magnúsi R. Einarssyni í dag. Það er liggur núna stríður straumur ferðamanna til Vestmannaeyja og von á fleiri tugum skemmtiferðaskipa með erlenda túrista plús svo alla þá sem koma með Herjólfi. Magnús segir í póstkorti dagsins frá því þegar hann var munstraður til að fara með eina rútu af bandarískum eldri borgurum um Heimaey vegna skorts á leiðsögumönnum. Hann segir líka frá þjakandi skorti á þjónustufólki við Spánarstrendur þrátt fyrir mikið atvinnuleysi í landinu.

_________________________________________

Tónlist í þættinum:

Stína Ó Stína / Öskubuskur (Árni Ísleifsson -Aðalsteinn Aðalsteinsson)

Hagi (Þorgrímur Jónsson höfundur og flytjandi)

Þar sem allt grær úr Litlu Hryllingsbúðinni, söngur Edda Heiðrún Backman. (Howard Ashman, Alan Mencken og Magnús Þór Jónsson).

Í huga mér / Brimkló. Erlent lag, textahöfundur Jón Sigurðsson.

UMSJÓN: GUNNAR HANSSON OG GUÐRÚN GUNNARSDÓTTIR