Trotz äisegen Temperaturen dobaussen, war et en hëtzege leschte Weekend an Europa. An Italien ass d'Reform vun der Verfassung duerch e glaskloere Nee vum Vollek gekippt ginn, an mat hier d'Regierung vum Premier Renzi, mat allen Froen di dat mat sech bréngt. Zäitgläich huet d'Nopeschland Éisträich mam Alexander van der Bellen endlech en neie President krut.
D'Gefill ofgehaangen ze gi vum sozialen an wirtschaftleche Fortschrëtt, d'Perspektivlosegkeet um Aarbechtsmaart, d'Angscht virun enger Zouwanderung vu Migrante féieren an Europa wéi an Amerika zou engem Malaise deen zum Brexit, der Wahl vum Donald Trump, wéi zum Ausgang vum Referendum an Italien geféiert hunn. Si werfen och hire Schied op d'Wahlen di 2017 an Frankräich an Däitschland ustinn.
Fir bei Éisträich ze bleiwen, et berouegt, datt en europafrëndleche Politiker géint den Rietspopulismus bestoe konnt. An awer bleift, datt dës Presidentschaftswahle keng Stärestonn vun der Demokratie waren.
Ugefaange mat de Wahle selwer: kloer Virschrëfte ware beim Ausziele vum éischte Vote am Mee net agehale gi, esou datt d'Wahlen hunn missen den leschte Sonnde widderholl ginn. Dat dierf an engem Rechtsstaat net passéieren, well demokratesch Wahle mussen iwwer all Zweiwel stoen, wann een d'Demokratie net am Kär well treffen. D'Decisioun vum éisträichesche Verfassungsgeriicht, d'Wahlen ze widderhuele war dofir déi eenzeg richteg. Wat fir eng Legitimitéit hätt soss de neie President gehat?
Keng Glanzleeschtung vu politescher Ausernanersetzung waren awer och d'Konfrontatioune vun de politesche Géigner op der Televisioun. Et deet der Glafwierdegkeet vu Politiker net gutt, wann aplaz vum Austausch vun Argumenter, mat Ënnerstellunge geschafft gëtt an dem Géigeniwwer systematesch Lige virgehäit ginn. No enger méi ewéi penibeler Konfrontatioun bei deem éischte Wahltermin, huet och den leschten Fernseh-Duell net vill Guddes bruecht. Ganzer 24 mol huet den Rietspopulist Hofer sengem politesche Géigner Ligen an Onwourechte virgehäit, ouni dat an iergendenger Form ze beleeën.
Dëst erënnert un déi iwweraus erfollegräich Wahlstrategie vun engem Donald Trump, deen beschtens gewisen huet, ewéi een mat permanenten Ënnerstellungen d'Kredibilitéit vum politesche Géigner kann ënnergruewen. Et ass eng geféierlech Tendenz an onser haiteger Zäit, gestäerkt duerch de Vehikel vun den soziale Medien, datt d'Wourecht ëmmer manner eng Roll spillt.
Besonnesch dramatesch ass dobäi, datt den Niveau vun der politescher Ausernanersetzung sech op d'Stëmmung am Vollek iwwerdréit. Dat huet een net nëmmen an Éisträich, mee och an Italien oder den USA gesinn. An Éisträich op jiddwerfalls huet seelen eng Wahl e Vollek esou gespléckt. Duerfir sinn ech frou, dass dem neigewieltem President seng éischt Prioritéit ass, d'Rëss an der Gesellschaft ze Kitten an d'Vollek erëm zesummen ze féieren. Ech wënschen him derbäi vill Erfolleg!