Et vergeet kaum en Dag ouni spektakulär Trump-Noriichten, déi fir gehéiereg Opreegung an Protester suergen. An den USA , virun allem awer am Rescht vun der Welt.
 
Den 45. US-President  brécht am Fong mat all deem, wat d’Leit esou gewinnt waren an der Politik. Den Trump ass anescht, et kann ee soen erschreckend anescht. Wou dat alles virun allem aussepolitesch hiféiere wäert, ass net ganz kloer. Dee grousse Plang vum Trump ass hei net ze erkennen. AmRraum steet ee Leitmotiv, dat fir vill Duercherneen suerge kann:  „America first“ .
 
Nun ass de Phänomen Trump an een staarkt Fokusséieren op dat eegent Land am Fong keen isoléierten Phänomen. Och an Europa sinn ëmmer méi Politiker a Parteien, déi an hirem Positionnement national-populistesch Téin uschloen an de Protektionismus als bescht Rezept beschreiwen.  Dëst souzesoe als Géigenprogramm zu enger globaliséierter Welt, an där méi Grenzen falen ewéi der opgebaut ginn.
 
Wat sinn d’Grënn fir des Entwécklung a wou leien déi déif Ursaachen heivun? Do fale mer spontan zwou Äntwerten an.
 
Eng éischt dovun betrëfft déi politesch Klass, déi sech vläicht ze vill ewech beweegt huet vun den eigentlechen Suergen a Problemer vu ville Leit. Des kruten dacks den Androck si géifen net eescht geholl. Dëst Gefill verstäerken net zulescht déi sëllechen Affairen, wéi zum Beispill a Frankräich. Ech denken hei ganz aktuell un de Kandidat François Fillon, deen vum politeschen Moralapostel elo selwer zum presuméierten Acteur an enger Affaire ginn ass. An dësem Kontext ass ee Saz vum Fillon a senger Ried ugangs der Woch symptomatesch fir d’Haltung vun ofgehuewenen Politiker. Am Kontext vun der Affaire Sarkozy sot hien en Dënschdeg virun sengen Leit Folgendes: „Ce matin, j’ai une pensée émue pour Nicolas Sarkozy et tous ceux qui vont être mis en cause par la justice dans les jours prochains.“ Mir déi gutt, d’Justiz déi béis. Esou einfach ass et. Des arrogant, jo scho bal suffisant Haltung schaaft weder Vertrauen nach Glafwierdegkeet bei de Leit. De Gruef tëscht der politescher Klass an deenen aneren gëtt esou ëmmer méi déif.
 
Mat dem Erfolleg vu den Populisten hunn och deels déi ze dinn, di iwwer déi ëffentlech Saach beriichten. Beispill Trump. D’Medien hunn dem Mann enorm Plattformen  gebueden. Dat ass et awer net alleng.  Et ass esou, dat systematesch Autoritéiten an Institutiounen awer  och d’Politik en général bewosst an e schlecht Liicht geréckelt ginn. Alles korrupt. Alles Profiteuren. Alles Leit an Acteuren, déi keng Problemer upaken. Wann een dëst Bild ze laang zeechent, traut keen méi deenen esou genannten Etabléierten. Dann hunn d’Populisten an d’Extremisten et einfach. Si nëtzen dann déi Vertrauenskris aus, déi selwergemaacht ass an op engem Splécken vun der Gesellschaft berout: d’Elitten op der enger, déi einfach Leit op der anerer Säit. Dat ass ongesond. Dat misst deenen ze denken ginn, déi Politik maachen an awer och deenen déi doriwwer beriichten.