Michel Maquil
Fräie Wirtschaftsberoder
Fréieren Direkter vun der Lëtzebuerger Bourse

Vun alle Forme vun der Microfinanz ass sécher d‘Microassurance oder d‘Microversécherung déi Form déi sech am spektakulärsten an de leschte Joeren entwéckelt huet. Hei geet et drëm Awunner aus Entwécklungslänner, besonnesch Baueren an Handwierker, eng einfach Méiglechkeet unzebidden fir sech géint perséinlech Schicksalsschléi an besonnesch och géint Naturkatastrophe, wéi Stierm an iwwerméissege Reen, ofzesécheren. Et ass drëm gaangen fir ee System op d'Been ze stellen deen esou einfach wéi méiglech ass fir datt e bezuelbar bleift fir déi Leit deene soll gehollef ginn.
Ass de Versécherungskontrakt ofgeschloss, an trëtt ee Schued duerch eng Naturkatastroph an, da brauch ee fir d‘Ausmooss vum Schued festzestellen, keng Inspekteren op d‘Plaz  ze schécken. Et geet duer fir detailléiert Satellitebiller ze huelen an och aner meteorologesch Informatioune, fir dann de Schued relatif genee anzeschätzen. D‘Entschiedegung fir de Bauer oder den Handwierker kann iwwer ee mobilen Paymentssysteem direkt un déi betraffe Persoun oder séng Famill ausbezuelt ginn. Domat kann dee System mat engem Minimum vu mënschlechen Asaz fonktionnéieren, also och mat engem Minimum vu Käschten.
Fir datt esou ee Systeem am grousse Stil agesat ka ginn, brauch et eng Rei Bedingungen. Ennert hinnen mussen detailléiert genuch, brauchbar Satelittebiller a meteorologesch Informatiounen disponibel gemaach ginn. Och musse sécher Geldiwwerweisungssystemer an deene Länner funktionnéieren fir esouwuel d’Primen ze encaisséieren, wéi och fir d'Entschiedegungen auszebezuelen. Hei kënnen déi westlech Länner an déi grouss Telefons Operateuren hëllefen, fir datt déi Bedingunge geschafe ginn.
Wichteg ass et och ze suergen datt déi Systemer vu Microversécherung schnell finanziell nohalteg gemaach ginn. Dat ka geschéien doduerch datt si net fir all Käschte mussen opkommen, deen den Opbau vun esou enger Infrastruktur verlaangt. Eng Rei staatlech Organisatiounen an och privat Donateuren hunn hei ee grousse Bäitrag geleescht. Schlussendlech kënnen déi grouss Versécherungsgesellschaften nëmmen aus esou Systemer léieren a sinn och ganz aktiv Partner nieft den Operateure vum mobilen Telefonsnetzer.
Et ass de Beweis datt déi nei Technologie wiesentlech Verännerunge ka mat sech bréngen, wa se geziilt agesat gëtt an deem de globalen Impakt also de laangfristege Rendement wäit méi am Fokus steet wéi dee kuerzfristege Profit. Esou ka Millioune vu Familjen, a schwierege Situatioune an den Entwécklungslänner, ganz effektif gehollef ginn.
Lëtzebuerg huet sech am Domaine vun der Micro-Versécherung een internationalen Numm gemaach. Dee weltwäiten „Micro Insurance Network“ huet säi Sëtz a seng Bureauë zu Lëtzebuerg. Dee Reseau besteet aus enger Gemeinschaft vun 300 Experten an 80 Organisatiounen aus iwwer 40 Länner an e setzt sech a fir datt Micro Versécherung weider entwéckelt gëtt firan ëmmer méi Länner an oft a ganz entleeëen Géigenden, nach méi efficace kënnen ze schaffen.

Michel Maquil
Lëtzebuerg, 22. Juni 2018