Fréier war et d’Halbzäit um Faaschte-Wee fir Ouschteren. Z’iesse gouf et noutgedrongen net vill. – Mir hunn et besser, a kippen “bon an mal an” een Drëttel vun all kaaften Iesswueren op den Tipp.
Besënne mir eis awer nach? Grond genug dozou hätte mer jo an enger Welt wou déi aal Staaten iwwerdubbert ginn vu riesegen multi-nationalen Gebilden, déi iwwerall matmëschen, just do net, wou Steiere bezuelt sollte ginn.
Iwwerhapt: t’ass net nëmmen de Staat deen eis ëmmer méi ofkënnt, an eis giel Gilleten undoe léisst, mee aller-eelsten Gepflogenheeten: e mariage pour tous ersetzt eis deklasséiert Famill a fir de Nowuess suergt ëmmer méi e wëssenschaftleche Laboratoire. De Nowuess ass op d’Mooss geschneidert a quetscht sech lues awer sëcher eraus. – Ee Chines seet da just nach: O, He!
Mir ginn hannerzeg an d’Zukunft eran, quasi: blanne Männerches, sot schon de Paul Valéry, lang ier een Trump fake news zur Moud gemacht huet. D’Welt geréit aus de Fouen, mengt dann e réckstännege Philosoph.
Wien also waart nach op een Heiland fir d’Ouschterdeeg? E Roboter soll den helleje Mann ersetzen. Mat Deem ass et jo souwisou schief ausgang, quitte datt en happy-end an hellejen Texter steet.
Äschermëttwoch: d’Welt an däitsch Autoen streeë sech Stëps oder Feinstaub iwwert d’carrosserie. Iwwert “Glaube, Liebe,Hoffnung” gëtt grad sou gegrimmelt wéi iwwer “Liberté, Egalité, Fraternité”, och wann ewell den houdäitsche Marx neierdengs en Erzbëschof ass.