L'Artg musical fa visita ad in dals impurtants dirigents grischuns.

«La vusch virila ha insatge profund, savura da terra, dat fundament. Jau sun fascinà da quest tun. Quai è er il motiv ch'jau lavur uss dapi 40 onns cun chors virils», di Christoph Cajöri insanua. E lavurar cun chors virils e maschadads, cun orchesters, solistas e solists è sia passiun e professiun. Dapi il 2012 dirigia el la Ligia Grischa, bain il capo chor viril grischun.

Tgi è Christoph Cajöri? En duas emissiuns emprova l'Artg musical da s'avischinar al dirigent, chantadur, arranschader e cumponist oriund da Tusaun, ami da nus Rumantschs. En l'emprim stattan l'uffanza, ils onns da studi e surtut Christoph – il dirigent en il center. E nus tadlain sa chapescha musica orchestrala e chanzuns dirigidas dal maestro da Tusaun ch'abitescha da temp en temp era a Ziràn. (2. part: Artg musical da dumengia: 27-06-2021 a las 14:03 u sin rtr.ch).