Clara Wieck è stada la pli famusa virtuosa da clavazin da ses temp, enconuschenta en l'entira Europa, in vair «star». E quai gia sco uffant da diesch onns! Il bab, Friedrich Wieck era sez scolast da musica. Da quai temp ha lez dà dimora ad in da ses scolars da clavazin – Robert Schumann ch'era nov onns pli vegl che Clara. In pianist baingea talentà, ma da lez temp strusch enconuschent. Pli tard èn Clara e Robert s'inamurads ed han vulì maridar, ma quai ha chaschunà gronds conflicts cun il bab. L‘ami Robert Schumann era daventà in rival: il bab temeva per la carriera da la pianista, temeva dentant era da perder la rolla sco impressario dad ella. En «La classica» udis vus dapli da la via crappusa che Clara e Robert Schumann han gì dad ir, lur chanzuns d'amur e lur musica da clavazin.Redacziun: Rosvita Barenius