Dal jazz fin a l'improvisaziun, da la musica populara fin a l'experimental: dals Frars Janett & Caviezel e Szilla als Fränzlis da Tschlin, cun C'est Si B.O.N, Standards of Rumantsch e cun ses frar Domenic.

En il center da l'Artg musical stat Curdin Janett. Il musicist e cumponist oriund da Tschlin ha gist festivà ses 70avel – e nus dain in sguard sin sia carriera musicala e sias staziuns. Da Curdin Janett datti era numerusas cumposiziuns da tut ils geners, da musica populara tradiziunala, da quella plain experiments e surpraisas, tocs da jazz e blers arranschaments per chors, bands e chapellas.

En l'Artg musical raquinta el era da sia uffanza a Tschlin, da ses emprims pass musicals, da ses instruments ed era da ses figl e sias figlias che han ertà sia passiun per la musica. E cler che vus udis er intginas da sias cumposiziuns. Per exempel «La polca da nona», «La mazurca dal Bambus», «La cupicharola nova», il «Blues in F pels giats da Fritz», e la bella mazurca «Davo la lomma». Nus laschain sunar e chantar il Cor da la scola media evangelica Samedan, ils Frars Janett & Caviezel, Satie's Fraktion, Szilla, ils Fränzlis da Tschlin, C'est Si B.O.N, Standards of Rumantsch – e vus udis er co ch'el suna ensemen cun ses frar Domenic.