Sara Pálsdóttir og Ásdís Olsen komu í þáttinn í dag og sögðu okkur frá því hvernig dáleiðsla getur umbreytt og heilað og hvernig hægt sé að nýta hana til að uppræta margvísleg vandamál.

Við höfum fjallað talsvert um áföll og afleiðingar þeirra undanfarið í þættinum. Í dag kom Þorsteinn Guðmundsson, góðkunningi þáttarins, til okkar. Hann er sálfræðingur hjá Áfalla- og sálfræðimiðstöðinni og sinnir þar greiningu og sálfræðilegri meðferð fullorðinna. Meistararitgerð Þorsteins fjallaði um alþjóðlega rannsókn á inngripi við áleitnum endurminningum í áfallastreituröskun og í starfi sínu veitir hann fólki með áfallastreituröskun meðferð. Við fengum hann til að fræða okkur um samtalsmeðferðir við áföllum í dag.

Svo í lok þáttar heyrðum við í Sæunni Þorsteinsdóttur sellóleikara. Hún býr og starfar í Bandaríkjunum og hefur verið að spila með stærstu hljómsveitum heims í þekktustu tónlistarhúsum heims. Hún er svokallaður staðarlistamaður Sinfóníuhljómsveitar Íslands og mun spila á tvennum tónleikum með hljómsveitinni, þeim fyrri næsta sunnudag 26.feb og svo þá síðari 30.mars. Sæunn sagði okkur frá tónleikunum og því að koma heim að spila með Sinfó. Hún átti sem sagt að vera komin til landsins en það getur verið flókið að ferðast með dýrmætt hljóðfæri og við fengum að heyra af hverju hún missti af fluginu heim.

Tónlist í þættinum í dag:

Borð fyrir tvo / Hjálmar (Sigurður Halldór Guðmundsson og Bragi Valdimar Skúlason)

Sunny Road / Valdimar Guðmundsson (Emilíana Torrini og Dan Carey)

Svona eru menn / KK (Kristján Kristjánsson)

Litla lagið / Sigrún Harðardóttir (Ómar Ragnarsson, Bennet, Welch, Marvin & Rostill)

UMSJÓN: GUNNAR HANSSON OG GUÐRÚN GUNNARSDÓTTIR