Até este venres están en Alfafar (unha das poboacións máis afectadas pola DINA en Valencia) voluntarios de protección civil de Tui.

Dende onte están traballando, sobre todo, baleirando sótanos e vivendas. Falamos con Óscar Rovira, un destes voluntarios, quen daba conta do que é estar alí, no terreo.

A axuda que se está solicitando neste momento para as persoas damnificadas pola dana é sobre todo económica. Así o explicaba hoxe o alcalde de Tui, Enrique Cabaleiro, tras as reunións que onte mantiveron no Concello de Tui e hoxe no de Tomiño da Mancomunidade e nas que participaron representantes das ONG's que están a traballar na zona. Os concellos da Mancomunidade coordinarán os medios existentes na comarca e os custes dos servizos de emerxencia que se trasladen a Valencia. Insistía o rexedor tudense en que a recomendación nestes momentos é non recoller nin roupa nin alimentos xa que na zona están saturados os servizos de loxística e almacenaxe.

O Liceo Casino de Tui acolle clases de sevillana todos os mércores ás 20 h. Mar Iglesias é a bailarina e profesora encargada de impartilas, e hoxe contounos todos os detalles destas clases, que teñen un custo de 30 euros por mes e que non esixen coñecemento previo.

Proseguimos a rolda de conversas tras o pleno extraordinario celebrado o pasado mércores, 31 de outubro, pola corporación municipal de Tui. Hoxe foi a quenda de Carmen Núñez, voceira do BNG.

Este domingo día 10 de novembro vai celebrarse a novena edición de Pinta Tui. Unha actividade enfocada en todo tipo de participantes, de todas as idades e con variedade de técnicas. José Manuel Díez, de Artes Creativas Efectos, explicou na nosa sintonía que é precisa inscrición previa para participar.

Mañá martes haberá unha nova cita do Cineclub Tui coa proxección da película A noite americana, de François Truffaut. Será en dúas sesións, a primeira ás 18.30 h e ás 20.45 h na aula da UNED. Pablo Romero e Javier Argüelles, do Cineclub, déronnos os detalles desta película.

Con José Manuel Palacín, voceiro de C21 abrimos hoxe a rolda de conversas sobre o pleno extraordinario celebrado o pasado mércores pola corporación municipal.

Hoxe terá lugar un roteiro nocturno de Samaín en Tui. Será de 21 h a 1 h, cun percorrido que comezará na praza da Inmaculada, en grupos de 10 persoas que irán partindo cada cinco minutos. Ao longo da andaina poderanse cruzar con misteriosos personaxes que, ademais de contar as súas historias de vida, poden provocar algún susto inesperado. Lolo Castro, de Barafunda, explicou o seu funcionamento.

Naldo Costas vén de recibir as catro estrelas de TheQHair en Madrid, que recoñece aqueles salóns que destacan pola súa excelencia e calidade no servizo. Falamos con Naldo sobre o que significa recibir esta distinción, do que é dedicar unha vida á perruquería e tamén do talento e comercio tudenses.

Esta fin de semana do 2 e 3 de novembro celébrase o Mercadiño e Exposición de Motos Antigas no pavillón polideportivo de Goián. Haberá exposición e venda de clásicas, recambios, miniaturas, ferramentas e coches clásicos. José Fernández, da Asociación de Amigos das Motos Dalle Gas, deunos os detalles.