"Facendo o Indio" é o espectáculo, para público familiar, que mañá venres, ás 19 h, presenta Galitoon no Teatro Municipal de Tui. A obra está dirixida por Chisco Casteleiro que forma parte do elenco xunto a Jona García. Ao longo de sesenta minutos prometen facer rir ao público, tal e coma explicaba o propio Chisco Casteleiro.

"Los Espigadores y la Espigadora" de Agnes Varda é a película que proxectará mañá venres, 7 de marzo, ás 21 horas o Cineclub Tui, no Espazo Sociocultural da rúa Camilo José Cela. Con Noemí Guisande, do Cineclub repasamos os detalles desta cita que terá un pase único aos prezos de 2 euros para persoas socias e 4,5 para público xeral. Amais hoxe celebran unha asemblea de socios, ás 20.30 horas na Aula UNED.

“Os Nosos Dereitos, hoxe, mañá e sempre!” é o lema que o Concello de Tui elixiu este ano para conmemorar o 8M, Día Internacional da Muller. O cartel deste ano é obra da ilustradora Luz Beloso no que representa a varias xeracións de mulleres erguendo a voz para defender os seus dereitos. Hoxe falamos coa artista sobre esta creación e sobre a necesidade de seguir traballando por acadar unha sociedade máis igualitaria.

A Asociación Laxes de Paramos súmase á conmemoración do 8M cunha “Xornada pola igualdade”. Será este domingo ás 17 h no Centro Cultural Laxes de Paramos coa charla-coloquio “Sementes de igualdade, primavera morada” a cargo de Priscila Retamozo, e ás 18 h, a compañía Espectacular representará o contacontos, para público familiar, “Os mundos de Elisa”. Lucía Estévez deu conta destas dúas actividades que terán entrada libre.

O grupo show do Club de Patinaxe Artístico Ribex proclamouse onte Campión Galego. Con este primeiro posto logra a praza para o Campionato de España. O seu cuarteto foi terceiro. Hoxe valoramos con Carolina Figueroa, adestradora do club tudense, este novo éxito deportivo.

Máis de 1.200 persoas participarán mañá, ás 17.30 horas, no XXXVI Concurso Desfile de Entroido en Tui, no que haberá 15 comparsas chegadas de distintos puntos da provincia. A concelleira de Cultura, Sonsoles Vicente daba conta desta programación e tamén do peche do Entroido en Tui, este domingo 9 co Enterro do Bacallau.

Continuamos o noso percorrido para coñecer os detalles dos centros educativos de Tui co Seminario Menor San Paio, da man do seu rector, Antonio Menduiña, e dous alumnos.

Con Paula Lima, directora do CEIP de Guillarei, coñecemos os detalles do proxecto educativo, pedagóxico e os servizos deste centro.

Música en directo en Tui a partir das 21 h desta noite coa que promete ser a primeira Jam Session de moitas no espazo sociocultural da rúa Camilo José Cela. O concerto de hoxe correrá a cargo de Phantom Club. Deunos todos os detalles o músico Frans Banfield.

A Asociación Sociocultural e Deportiva A Insua organiza mañá, sábado 1 de marzo, unha cea de Entroido con baile e concurso de disfraces, todo no local da Comunidade de Montes de Caldelas. Coñecemos os detalles con José Álvarez, da Insua.