Este sábado comeza a programación cultural de outono no Teatro Municipal de Tui. En total serán nove citas que combinan teatro, música, maxia e cinema. A concelleira de Cultura, Sonsoles Vicente, repasou a programación que se abre co concerto “Ingrávida” de Mercedes Peón, ás 20.00 horas.

A entrada para este espectáculo é de balde e é preciso facer reserva en tui.gal. Na mesma web están xa dispoñibles as entradas para todos os espectáculos.

Inicio e fin da zona azul, carga e descarga e prazas de aparcamento para persoas con mobilidade reducida son os catro novos sinais informativos que están sendo xa colocados nas rúas de Tui onde o aparcamento estará regulado pola nova ordenanza da zona azul, controladas mediantes cámaras de lectura de matrícula.

Hoxe resolvemos dúbidas co concelleiro de Urbanismo, Miguel Méndez, e coa empregada municipal Alba Martínez.

Hoxe comeza a Semana Cultural de San Miguel en Pazos de Reis cunha cita teatral. Ás 20.30 horas o grupo Aloia interpretará “Cun pé no ceo” no Centro Cultural. Non será a única cita xa que mañá, tamén as 20.30 horas, celebrarase o playback infantil e o domingo será a quenda do contacontos con Bego Bras e “Feliz Feroz” e da maxia con Samuel Moreno, a partir das 18.00 horas.

As propostas continuarán o vindeiro xoves 25 e venres 26 e pecharanse o domingo 5 de outubro cunha nova cita teatral. Desta programación deu conta hoxe Miguel Enríquez, da Asociación Aloia.

Este domingo día 21 haberá unha nova actividade enmarcada no Setembro Xudeu. Será un xogo de escapismo sobre a comunidade xudía de Tui que partirá dende a Oficina de Turismo de Tui. Erea Rodríguez, de Skeirrum deu todos os detalles deste xogo.

As persoas que desexen participar deberán inscribirse no formulario dispoñible na páxina web do Concello e pódese contactar co teléfono 674 31 42 78 para resolver dúbidas. Os e as menores de 12 anos deben ir acompañados dunha persoa adulta.

Mañá 20 de setembro remata o prazo de inscrición para o acto cívico de homenaxe no Ano Castelao “Os viños de Castelao” que se vai celebrar o domingo 28 deste mes, ás 12 h, no edificio da praza da Inmaculada.

Contará coa intervención do historiador Bieto Alonso, que falará sobre “O itinerario político de Castelao” e continuará con “Os viños dos espazos que habitou Castelao. Explicación e degustación” que estará a cargo da sumiller tudense Marina Cruces. Con ela falamos hoxe sobre esta actividade.

As inscricións poden realizarse no correo electrónico da Oficina Municipal de Turismo: [email protected].

"Patrimonio xudeu na Eurocidade Tui-Valença" é a visita que, dentro do Setembro xudeu, vai ter lugar este sábado ás 17 h. Partirá dende a Oficina Municipal de Turismo.

Guiará a visita o doutor en Historia da Arte Suso Vila, quen hoxe deu os detalles sobre esta cita.

Co acendido do alumeado, mañá venres, ás 21.30 horas dan comezo as festas na honra á Virxe das Dores en Guillarei. Até o luns concertos, verbenas e actos litúrxicos centrarán o programa festivo que hoxe repasou polo miúdo José Ferreira, presidente da Comisión de Festas Virxe das Dores de Guillarei.

Un centenar de xinetes e amazonas de Galicia e Portugal, con idades dende os 5 anos, participarán dende mañá en Tui no Concurso Nacional de Salto **. Celebrarase nas instalacións do Club Hípico Equigalia. Coñecemos todos os detalles e cómo será a competición con Paula López, directora do concurso.

A piragüista salcedense do Club Penedo Te Importa de Caldelas, Ainhoa Lameiro, participou a comezos deste mes na Copa do Mundo de Slalom que se celebrou na cidade alemá de Augsburgo. Foi 23º, aínda que chegou a esta cita sen expectativas despois dun verán afastada das piragüas e tres anos nos que chegou a plantexarse a retirada deste deporte. Con ela conversamos sobre este período e dos seus plans de futuro.

A Aula CEMIT de Tui acolle este sábado de 9.30 a 14.00 h un dos seminarios do Día de Scratch, organizados pola Axencia para a Modernización Tecnolóxica de Galicia, en colaboración co Colexio Profesional de Enxeñaría Técnica en Informática de Galicia, CPETIG. Trátase dunha iniciativa que busca achegar á rapazada ao mundo da programación dun xeito lúdico e práctico.

Está dirixido a mozos e mozas de 7 a 15 anos, que deberán participar acompañados dunha persoa adulta.

Juan Luis Miguéns, secretario do CPETIG, deu todos os detalles.