Día a Día

Como pode afectar o cambio horario ao sono infantil, como previlo ou xestionalo, e os hábitos de sono, son algunhas das cuestións que hoxe abordamos con Andrea Docampo, psicóloga sanitaria de Anarela, ante o o incio do horario de inverno esta fin de semana.

Até o próximo mércores, 28 de outubro, está aberto o prazo de inscrición para a Andaina do Samaín en Pesegueiro organizada pola Asociación Entroido de Pesegueiro. Será un percorrido de 6 quilómetros pola parroquia do que hoxe nos falaron Iria Rey e Cris Míguez.

A inscrición cun prezo de 7€ pode facerse no 633 29 00 86.

O Mercado de San Antonio acollerá mañá dende ás 11 h unha nova xornada gastronómica nesta ocasión centrada en produtos de outuno. O chef Stefano Quarta, de Aldente, explicaba as tres elaboracións que vai preparar.

Será Risoto con cabaza e lacón; Lacón con grelos e Castañas confitadas con crema de mascarpone. O prezo da cada ración será de 6€.

Un total de 155 patinadores e patinadoras de toda Galicia van participar mañá sábado e o domingo Tui no no pavillón municipal Gustavo Rodríguez na II Fase Categoría Rexional de Patinaxe.

Así nolo contou Carolina Figueroa adestradora do CPA Ribex.

Teatro, animación infantil e castañas é a proposta do magosto organizado pola Asociación Cultural Aloia de Pazos de Reis para este domingo.

A actividade, no centro cultural Aloia, comezará ás 18 h co grupo de teatro San Fins de Rebordáns coa obra “Ultramarinos norte”; de 18 a 20 h haberá animación infantil con Ludiland, e ás 19 h Castañas e música co grupo de gaitas e percusión Inquedanzas.

Así nolo contou Eva Pazo da Asociación Cultural Aloia.

Areas celebra festas na honra á Virxe do Rosario esta fin de semana. Unhas celebracións que comezan mañá venres e nas que non faltarán a gastronomía e a música.

Déronnos os detalles da programación Marcos Gómez, presidente, e Juan Boo, da Comisión de Festas de Areas.

O Coro Ecos do Castelao de Nirgrán, a Coral Son dos Cantares de Mos e a Coral Ponte das Febres de Ribadelouro darán a benvida ao outono este domingo no Centro Cultural de Ribadelouro co Festival da Coral da Caída da Folla.

A Coral Ponte das Febres, que en 2027 cumprirá 25 anos, é a organizadora deste evento. Así nolo contaron dous dos seus membros José Ángel González e José Manuel Solleiro.

O parque natural Monte Aloia acollerá este sábado a ruta "O Samaín galego: lendas e tradicións" con A Fada do Aloia. Será un percorrido para gozar en familia, coñecer as tradicións vinculadas ao Samaín e que é o que se celebra e as súas orixes.

A cita será ás 20 h, e os participantes poden ir disfrazados e levar unha cabaza decorada. É preciso inscribirse no 619 96 90 90 cun prezo de 14€ nenos e nenas e 16€ as persoas adultas. Ao remate haberá chocolatada, doces e agasallos para a cativada.

Este venres ás 21 h o Teatro Municipal de Tui acolle BenQuerer, un espectáculo de música, danza e tradición, cun só do baile de Fran Sieira acompañado do dúo musical Caamaño&Ameixeiras. As entradas están á venda en tui.gal aos prezos de 12€ e 9€.

Hoxe conversamos con Fran Sieira sobre o autocoidado, o amor por un mesmo e polos demais e como se pode transmitir todo isto dende a cultura e a tradición.

Kawan Álvarez e Xacobe Rodríguez, alumnos do ciclo medio de Comercio e Márketing do IES Indalecio Pérez Tizón, gañaron o terceiro premio do concurso Eduemprende Idea dotado con 1000 euros.

Hoxe contáronnos en que consiste este proxecto pensado para o sector marítimo e que emprega coma ferramenta a IA para calcular de forma máis precisa as rutas pesqueiras e anticipar acontecementos, o que redundaría na mellora da formación das empresas.

Falamos con Kawan Álvarez e Xacobe Rodríguez e coa profesora María Jesús Garbín deste premio e do traballo que realizan.