Este mes de outubro comezará un curso de defensa persoal para mulleres, no Ximnasio Di som, en Tui. Unha actividade orientada á prevención da violencia de xénero e ao coñecemento das técnicas de defensa persoal. Falamos co xerente Eduardo Méndez e a psicóloga Aída Fernández para coñecer máis datos desta iniciativa no Baixo Miño.

A piques de que se cumpran os primeiros cen días de goberno da nova corporación municipal hoxe comezamos unha rolda de entrevistas cos voceiros dos distintos grupos políticos.

Esta mañá acompañounos José Manuel Palacín, voceiro de C21, que se estrea na corporación municipal.

O domingo 6 de outubro, na Praza do Seixo en Tomiño celebrarase unha barbería solidaria para recadar fondos para a Asociación de Persoas con Discapacidade, Vontade. O prezo será de 7 euros.

A xornada contará con música en directo da man de Argonat Band e a cantante Laura Ocampo, entre outros. Ademais de inchables e a participación dun tatuador profesional.

Ás seis desta tarde comeza no Paseo Fluvial de Tui o I Tui Beer Fest, Festival da Cervexa Artesá. Até o domingo maridará cervexa con gastronomía, concerto e actividades familiares. Dos últimos preparativos dábanos conta Esteban Lourido, presidente da Asociación Galega de Cervexeiros Artesáns.

O equipo de futbol feminino de Tomiño cumpre dez anos, e o seu adestrador Jacobo Vázquez está en plena campaña de captación de rapazas para o equipo alevín (seis a 12 anos). O obxetivo esta tempada é aumentar o club e garantir o fútbol feminino na zona do Baixo Miño.

Con tan só 23 anos, o piloto Diego Vila acaba de proclamarse campión do Rally Ribeira Sacra. Agora encontrase competindo polo volante FGA (Federación Galega de automobilismo) e loitando pola beca "PXP" para novos pilotos.

O deportista valenciano Héctor Catalá e o seu guía, o tudense Gustavo Rodríguez, proclamáronse campions do mundo de Paratriatlón. Agora están cos preparativos para os Xogos Olímpicos de Tokyo 2020.

A Aula da UNED acolle mañá a partir das 9.30 h a Xornada "Turismo e Emprego: un futuro mellor para todos" organizada polo Concello de Tui. Esta mañá a concelleira de Emprego, Ana Mª Núñez, e de Turismo, Laureano Alonso, explicaron os obxectivos desta iniciativa, destacando a importancia do turismo na cidade.

O edificio da JUM, Juventud Unida en Marcha, situado en Paramos e que quedara gravemente danada na explosión do 23 de maio no barrio da Torre converterase nunha residencia de maiores.

Así o confirmaba esta mañá na nosa sintonía José Vidal Novoa, vicario de pastoral da Diocese de Tui-Vigo. Tras os danos sufridos na explosión buscaron poder darlle un novo uso barallando en primeiro lugar que puidera ser ocupado por algunha congregación, pero ao non frutificar esta opción, abriron a outras alternativas con carácter social. Hai uns días asinaron xa o acordo con Senes Fogar.

O edificio, que conta cunha superficie de 4 mil metros cadrados, unha vez rehabilitado ofrecerá 51 prazas para residentes. Suporá un investimento 1,7 millóns de euros.

Pilotos de toda Galicia, entre eles recente campión de España junior, participarán este sábado no XIV Dirt Track Xacob Agra no Velódromo Municipal de Porriño. Será a partir das nove da noite na modalidade habitual de carreira en óvalo e coma novidade terán un cara a cara entre dous pilotos, e coa singulariedade será que se celebrará pola noite.

A proba está organizada polo Motoclub Papaya, o seu presidente, Joaquín Agra, e vicepresidente, Julio Solleiro, déronnos os detalles desta competición na que haberá unha homenaxe a Gabriel Marcelli, campión do Mundo de Trial, e a Campión de España Junior, Corbacho.