Día a Día

O Rosal empeza hoxe o labor de desinfección con ozono nos vehículos máis empregados do Concello amais dos coches das enfermeiras e enfermeiros que están realizando asistencia domicilios no municipio. Así o explicou a alcaldesa, Ánxela Fernández quen recordou a veciñanza que non debe tirar aos contedores os residuos que deberían ir ao punto limpo, que continúa pechado.

Normalidade no Concello de Tomiño onde continua a oleada de solidariedade.Agora están a organizar xunto con ADETO unha rede para a elaboración de mascarillas e distribución no comercio local. Así o avanzaba a alcaldesa, Sandra González.

Enrique Cabaleiro, alcalde de Tui, deu conta hoxe dos asuntos que tratará mañá a corporación municipal de Tui en pleno. Tamén deu conta dos resultados do test COVID19 aos policías locais e a traballadora social. Tres membros da policía local deron positivo.

No Centro de Saúde de Tui teñen constancia de 18 casos positivos por COVID 19 de pacientes de Tui e de Tomiño, que teñan o médico no centro de saúde de Tui o Tomiño.

O doutor Pose convidaba a dedicar os aplausos das oito desta tarde á Policía Local de Tui, logo de confirmarse tres axentes afectados por coronavirus.

En Valença son un total de 6 casos de Coronavirus os rexistrados, unha situación moito máis tranquila que a que se vive noutros municipios coma Melgaço ou Monçao. Así o explicaba o presidente da Cámara, Manuel Lopes.

O alcalde da Guarda, Antonio Lomba agradeceu hoxe o labor dos voluntarios e voluntarias do Concello que contactan coas empresas locais do municipio para coñecer as súas necesidades. Tamén informou o rexedor que esta semana reunirase cos portavoces dos grupos políticos abordar os eventos previstos para o verán.

O Concello de Tomiño está a recibir doazóns de material de protección por parte de empresas locais. Un xesto que agradecía a alcaldesa Sandra González na nosa sintonía quen, recomendaba amais as medidas de hixiene do Ministerio de Sanidade.

Tres efectivos da Policía Local deron positivo por COVID19, un deles está illado no seu domicilio dende a pasada semana, e a outros dous - asintomáticos- recibiron onte o resultado do test.

Por outra parte este xoves ás 20 h a corporación municipal celebrará pleno extraordinario segundo adiantaba o alcalde, Enrique Cabaleiro.

Apoiar ao comercio local na actual situación que estamos a vivir e ao tempo brindar a poboación información sobre os servizos con que conta nestes momento é o obxectivo da iniciativa posta en marcha pola Concellería de Comercio de Tui.

A súa responsable, Ana Mª Núñez, explica que van confeccionar unha listaxe co comercio aberto ou que presta o servizo de entrega a domicilio, para o que os interesados deben dirixirse ao 670 245 633 ou ao correo [email protected].

No Rosal, a Garda Civil, Policía Local e Protección Civil reparten mascarillas aos que hoxe retoman a súa actividade laboral. Detallouno a alcaldesa Ánxela Fernández, quen informou da incorporación dun auxiliar a Servizos Sociais, e tamén do peche das fontes públicas.