Día a Día

Mañá ás 17.30h comeza no novo pavillón municipal de Tui o Campionato Galego de Grupos Show Júnior e Cuartetos. A competición comezará ás 17.30h cos cuartetos e ás 18h na categoría junior onde competirá o equipo júnior do Ribex buscando praza no Campionato de España.

Ás 21.30h a compañía Redrum Producciones de Santiago de Compostela presenta no Teatro Municipal de Tui "Invisibles". A obra está baseada no libro homónimo de Montse Fajardo. Está dirixida por Marián Bañobre e interpretada por Mela Casal, Sheyla Fariña e Nieves Rodríguez.

As entradas están á venda en www.culturatui.info ata ás 12h, e dende ás 20h no despacho de billetes, aos prezo de 6€ e 5€.

O bacallau será o protagonista esta fin de semana en Valença, xa que será o prato destacado en 24 establecementos hostaleiros do municipio, que ofrecerán entre outras preparacións o Bacallau ao San Teotonio.

No menú estará tamén o Caldo Verde de Valença, elixido coma unha das Marabillas Gastronómicas de Portugal. E coma sobremesa estarán os “Borrachinhos de Valença”. Contounolo José Monte, vereador de Cultura de Valença, quen tamén nos deu conta das celebracións de San Teotonio que comezan o sábado.

A Asociación de Afectados de Paramos e Guillarei vaise concentrar mañá, ás 11 h en Pontevedra diante do edificio da subdelegación do Goberno.

Segundo explican nun comunicado con esta acción queren reivindicar que, pese ás reunións mantidas coa subdelegación tanto antes como despois da redacción do Real Decreto-lei 2/2019, de 25 de xaneiro, as necesidades dos veciños de Paramos máis afectados pola explosión seguen sen ser atendidas. Así nolo explicou hoxe Lupe Pérez.

A actualidade deste xoves, 7 de febreiro en Noticias 13.30h.

Hoxe remata a IV Semana da Educación en Tomiño que deu comezo este luns. Durante estes días déronse cita, Coral Regi, Jorge Úbeda e Iria Marañón, que falaron da educación mais aló das modas, a educación nos centros escolares ou a educación en igualdade.

Hoxe pecha este ciclo de conferencias con David Bueno, doutor en bioloxía e profesor de xenética na Universidade de Barcelona, cunha charla baixo o título “Sorpresa! Que quere aprender o cerebro” na que tratará de dar as claves para sacar o mellor proveito dos procesos de aprendizaxe.

"Patapatúm" da compañía Elefante Elegante chega mañá o Teatro Municipal de Tui as 20.00h. É unha reflexión sobre o tempo, a crianza... un espectáculo de teatro visual sen palabras para público infantil e familiar a partir de 3 anos. María Torres e Gonçalo Guerreiro son os autores da obra, que tamén dirixen xunto a Pablo Sánchez. Amais María Torres e Gonçalo Guerreiro soben ao escenario con Agustín Bolaños, conformando o elenco do espectáculo.

Carlos Vázquez Padín, actual alcalde de Tui, confirmaba a súa candidatura para as eleccións municipais do 26 de maio. Estaba esta mañá na nosa sintonía, onde dicía que afronta esta nova lexislatura con ilusión e que cree que Converxencia 21 é a ferramenta que necesita Tui para prosperar.

Enrique Cabaleiro volve a encabezar a lista do Partido Socialista en Tui para ás eleccións municipais do 26 de maio. Hoxe na nosa sintonía deu conta de que esta nova candidatura responde a petición dos seus compañeiros de partido, di ademáis, que o afronta esta candidatura con moita ilusión pero tamén con moita responsabilidade

A pasada semana o IES San Paio sufría as consecuencias das intensas chuvias. As instalacións do centro sufriron goteiras que se converteron en filtracións preto das instalacións eléctricas e que provocaron o peche de varios corredores e desprendementos do falso teito.

Na mañá do venres a unidade técnica da Xunta de Galicia desprazouse até alí para analizar os desperfectos e buscar o foco do problema, neste caso, un problema de mantemento.