O concelleiro non adscrito, José Prada, absterase no pleno deste mes maio na votación dos orzamentos de 2018, polo que as contas poderán ser aprobadas cos votos do equipo de goberno. Onte chegaba a este acordo co alcalde, Carlos Vázquez Padín.

O alcalde de Tui, Carlos Vázquez Padín, e o concelleiro non adscrito José Prada Álvarez, chegaron onte a un acordo para sacar adiante os orzamentos do concello de Tui para 2018. O alcalde amosaba hoxe a súa satisfacción por este acordo, ao tempo que explicaba que hoxe mesmo convocará a comisión informativa para ditaminar o proxecto de orzamentos - o mesmo que se presentou hai un mes - para levalos ao pleno deste mes de maio.

Esta fin de semana ten lugar a XVII Romaría Cabalo organizada pola Peña Valle del Louro, un evento único no que se dan cita miles de persoas e que conta con espectáculos recoñecidos a nivel español.

Esta fin de semana A Guarda conta con varias propostas relacionadas coa cultura galega. Mañá sábado terá lugar no exterior do Centro Cultural o Mostra do Traxe Galego organizada polo Concello e a Asociación pola Recuperación do Traxe Galego. Amais o domingo rematarán a semana das Letras Galegas cunha Fira do Libro na praza do Reló, con obradoiros, sesión vermú, xogos populares e concerto de Mamá Cabra.

Esta fin de semana Oia celebra as súas Festas da Virxe do Mar, a Virxe do Carme e o Santísimo. Nesta ocasión a programación contará coa primeira edición do Festival de Música Atlánticas Emerxentes Omae, que reunirá mañá pola tarde a distintos grupos emerxentes galegos no enclave do Mosteiro de Oia.

SomosOcéano celebra o día das Letras Galegas cunha colaboración con Carrick. Así nolo contaron hoxe Ana Carpintero e o tudense Fran García, con quen tamén falamos da nova colección coma a camiseta de manga curta "Riquiña" ou da súa presenza en Bruxelas da man de Google.

Valença súmase tamén á celebración das Letras Galegas con gastronomía, libros, artesanía e música mañá á tarde na Fortaleza. Haberá unha demostración de cociña miñota a cargo de Joao Guterres, e outras propostas gastronómicas con Caldo Verde, as pataniscas de bacalhau, a lampreia fumada recheada, os callos ou as madalenas serão. Haberá postos de libros, de artesanía e música tradicional galegas. E amais ás 18.30h hora española no Jardim das Amoreiras actuará Andrea Pousa. Ela mesma falounos deste concerto

A II Mostra dos Maios de Salceda, na que participan vinte colectivos, abre mañá a programación das Letras Galegas no Concello de Salceda. Logo terán lectura de textos de Mª Victoria Moreno e ás 19h Concerto de Roberto Oliveira , Premio Martín Codax, no Auditorio Municipal. Así o detallou a concelleira de Cultura, Teresa Pérez.

Mañá ás 17h sairá dende a Alameda o desfile folclórico organizado pola Agrupación Cultural Guardesa dentro das actividades co gallo do Día das Letras Galegas. Os grupos participantes , Ballet Estudio 88 Talent Latino, Grupo de Gaitas da 3ª Idades, Do Lusco ó Fusco, A Boalleira, Anduriñas, A Ribeira do Miño, Churumbela, Xamaraina, Vento Mareiro, Caramuxiñas, Doxe nun Ano e O Trebón dos Xidos.

Logo actuarán no Auditorio de San Bieito onde se entregarán os premios co concurso de redacción de debuxo que convocou a Agrupación Cultural Guardesa, tal e coma nos explicou a súa presidenta Julia Sobrino.

A Praza do Calvario do Rosal acolle hoxe e mañá os actos organizados pola Agrupación Musical do Rosal co gallo das Letras Galegas dos que nos falou a Lali Álvarez, secretaria da Agrupación Musical do Rosal-

Hoxe dende ás 22.30h actuarán "Coro Fuscalheiro", "QuédeQué" e a popular e televisiva "A Banda da Balbina". Dende ás 21:00 horas haberá Porco ó Espeto a prezos populares.

Mañá están previstas diversas actuacións e actividades durante todo o día. Terán protagonismo os rapaces e alumnado da escola de música, mediante actuacións da Banda Infantil, Coro Infantil, Grupo de Clarinetes Kla-son, música tradicional con Orballo e As nove alí, etc. Pola tarde actuará "Bemolecontos" .