Día a Día

O Conservatorio Profesional de Música de Tui acollerá os días 11, 12 e 13 deste mes de xullo, a III Aula Internacional de Saxofón, organizada por este centro de ensino musical e a Asociación Frai Rosendo Salvado.

Terá a especialidade de saxofón pero este ano tamén análise e improvisación e jazz como explicaba Rubén López, director do Conservatorio, Jorge Vicente e Rafael Yebra. Dentro das actividades de Aula Internacional están previstos dous concerto abertos ao público en xeral con entrada de balde até completar a capacidade do local.

Dentro do programa previsto polo Pacto de Tui este venres, 6 de xullo, ás 22.30h actuará na rúa Compostela a orquestra folk Son de Seu que presentará na cidade o seu último traballo “Beiralúa” pero tamén temas doutros traballos, coma hoxe explicaba Xosé Liz de Sondeseu.

O pacto de Tui asinouse o 4 de xullo de 1137 na sala capitular da Catedral daquela en plena construción. Un acordo de amizade que supuxo establecemento da primeira fronteira política entre Galicia e Portugal. Así o explicaba hoxe o concelleiro de Cultura, Eduardo Freiría, sinalando que durante anos o espazo cultural continuou a ser homoxéneo ata o século XIX.

Tui conmemorará esta fin de semana este Pacto de Tui e o fai tendendo unha ponte musical entre Galicia e Portugal con concertos de Sondeseu e Teresa Salgueiro, previstos para o venres e o sábado ás 22.30h na rúa Compostela. O acceso será solidario cos afectados de Paramos.

No programa previsto co gallo da celebración do Pacto de Tui o sábado ás 20.30h na sala de exposicións municipal sobre o azulexo portugués como símbolo artístico da cultura portuguesa do Instituto Camoes de Vigo.

Este sábado e domingo, 6 e 7 de xullo, celébrase a III Feira do Peregrino organizada por ACITUI. Charlas, mercado de artesanía, obroiros infantís, actuacións de grupos folclóricos...forman parte do programa previsto na praza de San Fernando e na contorna, do que deron conta Juan Carlos Blanco e Manuel Santos da asociación de comerciantes.

Este verán Tui acollerá a segunda edición do campamento da Asociación Un Mais, de familiares e amigos de persoas con trastorno do espectro autista dirixido especialmente a nenos con TEA entre os 5 e 18 anos. A temática das actividades estará distribuída semanalmente e serán música, deporte, natureza, medios audiovisuais e saídas pola comarca. A novidade máis importante este ano é a inclusión de nenos sen TEA. Dende a organización queren facer fincapé na importancia da inclusión social destes nenos. Até o momento soamente hai dous nenos sen TEA apuntados polo que a organización fan un chamamento os pais.

O campamento comezou onte e se prolongará até o 27 de xullo, de nove e media a dúas excepto os mércores que se fará unha saída en autobús polo que se prolongará até media tarde. O prezo é de 50 euros por semana ou 160 por todo o mes.

A festa da Lagosta dará o pistoletazo de saída este xoves coas actividades suspendidas pola choiva a semana pasada e continuará o venres coa lectura do pregón de man do actor, humorista e cantante galego Nancho Novo. Este terá lugar as nove da noite na praza do Reló e as dez e media volverá ser o protagonista na Carpa do Porto, desta volta co seu espectáculo “El Cavernícola”.

Haberá ademais citas musicais e actividades pensadas para os máis pequenos toda a fin de semana ademáis da degustación gastronómica de até vinte pratos da cociña mariñeira e a tradicional lagosta.

Está xa en marcha o Curso de Iniciación ao Piragüismo que ao longo deste verán imparte o club Kaiak Tudense Axuda a Paramos dirixidos a nenos e nenas de 8 a 13 anos que se imparten os luns, mércores e venres pola tarde. Así nolo contou Manuel Pedrares, técnico do club Kaiak Tudense Axuda a Paramos, explicando que son tamén un xeito de captación de novos padeeiros.

A inscrición pode facerse nas instalacións do Kaiak Tudense Axuda a Paramos na rúa Olímpicos Tudenses, cubrindo o impreso de solicitude e levando dúas fotografías. O requisito imprescindible é saber nada.

Salvador García, presidente da Asociación de Afectados de Paramos e Guillarei, amosou a súa satisfacción pola resposta obtida na manifestación de onte ao mediodía na que demandaron que a todas as administración remen na mesma dirección e se impliquen para que Paramos volva á normalidade. En concreto demanda a declaración de zona gravemente afectada por unha emerxencia de protección civil, e a exención fiscal das axudas.

Pumoso con Gaseosa estará ás 23.30h no Betún co seu habitual Bizarre Freak Show. Mentres mañá sabádo, dende ás 22h, será unha noite de hip hop da man de G821 e Traste & Kronik.

A praza de San Fernando será hoxe venres ás 20h a derradeira parada de “Un chef no rural”, demostración gastronómica posta en marcha pola Escola Eu Rural, a cargo do recoñecido chef galego Iván Méndez para poñer en valor os produtos da terra. Entrada de balde ata completar aforo