O Liceo Casino será o escenario este sábado da gala benéfica Raiares para recaudar fondos para a Asociación de Afectados de Deleción 1p36. O evento empezará ás 20.30 e tratarase dun espectáculo que combinará moda e danza coa presentación de En Un Tristrás e música en directo.

Hoxe falamos con Eva Martínez e Eva Iglesias, presidentas da Asociación de Afectados de Deleción 1o36 e do Liceo Casino, sobre esta iniciativa. Amais María Penedo, xerente de Divos, e Paula Cobián, xerente da Escola de Danza Paula Cobián, explicáronnos en que consistirá a súa aportación.

Ás 20h o Colectivo Contra a Moción de Censura ten convocada unha manifestación na praza do Concello para mostrar o seu descontento ante a situación política. Como representantes deste colectivo hoxe contamos coas declaracións de Lolo Alonso, Silvina Bouzas e Javier Torre.

O alcalde de Tui, Enrique Cabaleiro, fixo balance dos incendios rexistrados onte en Paramos, Baldráns e Areas. Pero tamén deu conta da situación política a un día de que se celebre o pleno da moción de censura.

A un día de que se celebre o pleno da moción de censura Carlos Vázquez Padín, voceiro de C21 e candidato a alcalde, indicaba que ante o reto que agora afronta recoñecía que o ser alcalde de Tui é unha tarefa complicada. O feito de que o goberno que vai presidir sexa novamente cuadripartito dicía que esa é a menor das súas preocupacións, lembrando que teñen un acordo programático. Ao tempo que amosou a súa confianza na cohesión do novo equipo de goberno.

En Tomiño a alcaldesa, Sandra González, deu conta do lume rexistrado na tarde de onte en Amorín, onde un veciño viu coma o lume prendeu en tres puntos e o incendio aproximouse ás casas.

En Salceda o lume afectou a seis das sete parroquias. O Concello montou un operativo tentando coordinar os efectivos e aos propios veciños que se organizaron para facer fronte aos incendios. Segundo explicou o alcalde, Marcos Besada.

No CRA Raíña Aronga suspenderon as clases debido a que a meirande parte dos profesores veñen de Ourense, e tamén no IES de Parderrubias debido ao fume. Mantense a normalidade no CEP Altamira.

O alcalde de Tui, Enrique Cabaleiro, daba conta coma con medios municipais e dos veciños se fixo fronte aos tres incendios. O Monte das Penizas quedou totalmente calcinado dende Paramos a Guillarei, estendéndose logo a Salceda.

Tamén posteriormente se rexistrou outro incendio en Areas que quedou controlado de madrugada.

Lamentaba o rexedor tudense a falla de medios por parte da Xunta para extinguir estes lumes, a quen corresponde a competencia en extinción de incendios.

Na RMT recibimos a José Ramón Núñez para falar dun tratamento 100% natural: a apiterapia. Trátase dunha técnica contra distintos problemas como a dor cervical, a lumbalxia, as migrañas ou a artrose co veleno das abellas. José Ramón Núñez explicounos amais as facultades da apiterapia e como actúan outros compoñentes producidos polas abellas no corpo humano.

Na rolda de entrevistas aos voceiros dos distintos partidos con representación no Concello de Tui para falar sobre a moción de censura hoxe falamos con María Jesús da Silva. Ela é a nova voceira de APTui fixo que a moción foxe posible dende o punto de vista numérico. Sobre os motivos para asinar a censura ao actual goberno asegura que non pode opinar sobre a falta de diálogo, xa que non estivo en contacto directo co día a día da política local e, polo tanto, non o viviu, pero si xustificou a actuación na falta de consenso entre os actuais concelleiros. Sobre o programa que van a intentar a levar a cabo de agora en diante, asegura que é un punto de partida que se marcaron, recoñecendo que o tempo e as posibles trabas burocráticas xogan na súa contra. Asegurou que para levar a moción adiante valoraron diferentes realidades e que foi sempre consciente de que aparecerían voces contrarias e aos críticos que falan de volta atrás respondeu asegurando que é preciso ter en conta que agora os populares traballarán con tres grupos máis.

Para falar sobre a moción de censura tivo o seu espazo na RMT tamén Carmen Núñez, voceira do BNG e actual concelleira de Patrimonio. A súa opinión é clara, a moción de censura non está xustificada, amais asegurou que acordo programático que se presenta coa moción de censura non merece ningunha credibilidade despois da inactividade do PP cando gobernaba en maioría. Sobre o momento no que se presenta esta moción de censura Carme Núñez coincide cos seus compañeiros de goberno en lamentar que non se poida rematar a lexislatura, dende o seu punto de vista esta decisión está motivada polo medo a que se consolide unha opción alternativa ao PP e ao interese en recuperar a deputación.