Día a Día

Na Catedral de Tui están a levar a cabo as obras de acondicionamento dos espazos que formaban parte da antiga residencia do bispo, do palacio episcopal, para poder destinalos a usos culturais. A intención é que nun futuro o museo diocesano e o museo catedralicio poidan pasar a ocupar esas dependencias.

Estivemos a falar sobre estes traballos con José Diéguez Dieppa, deán da Catedral de Tui, que nos explicou en que están a consistir e os prazos que se manexan para esta primeira fase.

Hoxe ás 18h a Abadía do Pelouro, en Caldelas, acolle o espectáculo “música para salvar vidas” de Adança de Uganda, dentro da xira que están a realizar por Europa. Trátase dun espectáculo benéfico, cuxa entrada será de 5€, os fondos serán para un orfanato de Urganda. As prazas son limitadas. Así o explicou Laura Llauder.

Participará tamén a compañía Udanza da Escola O Pelouro que dirixe Laura Llauder

A RMT é partícipe dun proxecto que inicia mañá da man do CRA Mestra Clara Torres. Trátase da Escola de Nais e Pais “Pensando nunha nova educación”, que poñen en marcha dende este centro educativo e que nesta ocasión contará con entrevistas e espazos dedicados á educación tamén na radio.

Teresa Domínguez, a directora do CRA, estivo a falar con nós sobre esta nova edición e explicounos en qué consiste a Escola de Nais e Pais, que contará con figuras moi importantes no ámbito da educación.

Cen días despois da toma de posesión do novo goberno tras a moción de censura os proxecto que tiña sobre a mesa o anterior goberno están paralizados ou se cambian para retrasalos. Así o indicou esta mañá o voceiro de Son de Tui, Laureano Alonso, afirmando que a moción de censura supuxo unha paralización, ao tempo que pregunta pola situación dos proxectos que estaban encamiñados ou dos aprobados ao abeiro do Plan Concellos.

Por outra parte sinalaba que é difícil avaliar o traballo dun goberno que dende o primeiro momento ten liortas internas.

A concelleira de urbanimo, Mª Jesús Silva, fixo hoxe balance dos 100 días de goberno presidido por Carlos Vázquez Padín. Referíase ao traballo arreo con gran grao de responsabilidade que están a desenvolver. Porén foi máis crítica co labor da oposición, e no ámbito político o seu balance é negativo.

Mañá celébrase no Monte Aloia a Romería de San Xulián e dende fai anos un grupo de amigos se reúnen para subir andando ata a capela na peregrinaxe que se facía antigamente. A cita para todos os que queiran participar é no café El Pilar ás 9h para chegar ás 12h, cando comezará a misa solemne con procesión. Amais farán unha parada especial nun muíño onde se degustarán papas de millo. Contóunolo Manolo Crisóstomo, un dos encargados de recuperar esta tradición.

Esta mañá Esther Sánchez contounos a programación desta fin de semana na Asociación Cultural Betún, que contará mañá sábado coa presenza do seu colaborador habitual Dj Funkente. Amais tivemos ocasión de falar con Pedro Toro, que se ten encargado en moitas ocasións de realizar os carteis para os concertos do Betún.

Juanma Quelle, coach e autor do libro “Territorio Felicidad” participa este sábado a partir das 18.30h nun evento benéfico que terá lugar no Auditorio Municipal das Neves.

A finalidade do evento é a recadación de fondos para colaborar tras os lumes nese Concello.

A Asociación de Empresarios As Gándaras do Porriño leva a cabo este ano unha nova edición do programa Ponte ao Emprego, financiado pola Consellería de Emprego e Industria da Xunta de Galicia. Este ano participan 85 mozos menores de 30 anos, dos que unha gran parte son de Tui coa colaboración do Concello.

Estivemos a falar sobre este programa con Mónica Pampín, coordinadora do mesmo, que nos deu máis detalles sobre esta iniciativa para preparar aos mozos para a inserción laboral.

O músico e mestre de gaiteiros Antón Corral será homenaxeado mañá no Teatro Municipal de Tui nunha gala organizada polo Concello.

Estivemos a falar con Suso Corral, fillo de Antón Corral, e con Fina Fernández, autora do libro “Antón Corral. A alborada dun soño”, sobre unha homenaxe que contará coa participación dalgúns dos seus alumnos como Carlos Núñez, Anxo Lorenzo ou Anxo Pintos. Amais estarán agrupacións vinculadas a esta figura da música tradicional.