A peonalización do conxunto histórico comezará en breve de forma provisional nas fins de semana. A concelleira de Patrimonio, Carmen Núñez, amosou a satisfacción porque supón a culminación dun longo proceso. Precisamente dende hoxe os veciños poden retirar o mando a distancia das pilonas en Cerezo, na rúa Colón, presentando a resolución que lles remitiu o concello.

A avogada Cielo Martínez explica como facer fronte as cláusulas chan das hipotecas despois das recentes sentenzas do Tribunal Europeo de Xustiza que obriga a toda a banca española a devolver o cobrado por tidas cláusulas.

Esta fin de semana a cultura urbana chega a Tui por partida dobre co I Trofeo de Hip Hop e co Concurso de Graffiti.

Por unha banda o pavillón municipal acollerá este domingo o “I Trofeo de Hip Hop Cidade de Tui”. Por outra parte tamén o domingo pero dende as 11:00 celebrarase de xeito paralelo un concurso de graffiti nunha das fachadas do novo pavillón municipal.

Carlos Vázquez Padín, de C21 mantivo conversas con membros destacados do Partido Popular nos últimos días, a iniciativa propia ante o descontento co goberno municipal cuatripartito.

Lembrou Vázquez Padín que dende C21 apoiaron a investidura sen condicionantes e coma mal menor. Pero lamentaba que dende o comezo do mandato non houbo un só pacto ou tento de pacto con eles por parte dun goberno en minoría, salvo nos orzamentos onde pedían a eliminación do imposto de plusvalía que non saiu adiante. Ante esta situación explicaba que buscaron unha alternativa pero con matices cunha dereita renovada, para o que mantivo tanto reunións co PP, coma con PP de Tui, APTUI e CST a nivel local.

Na Asociación Cultural Betún presentan triple proposta esta fin de semana. Hoxe ás 22h actúa Palankalama: o cuarteto de Porto achega composicións baseadas na música tradicional/folk de diversas regións e imaxinarios. Mañá sábado tamén ás 22h será a quenda de Pan-Pan Dj, que busca sons e melodías entre o pop, o electro-pop, e outras moitas conxuncións ata chegar até a cumbia e os sons tropicais.

Xa por último o domingo ás 19h acutará o trío de jazz chegado dende Porto Pedro Neves Trío. Deunos conta da programación Iago Ramilo.

Despégate dos Malos tratos é o titulada da charla que hoxe ás 19h terá lugar no IES de Tomiño, para abordar a prevención das condutas de parella abusivas e violentas. Forma parte do programa “Sexualidade, Diversidade e Violencia Machista na Adolescencia” organizada polo PSOE de Tomiño.

Ana Vicente, axente de igualdade e educadora de ADAVAS será a encargada desta charla participativa na que porá o foco na prevención das condutas abusivas e os malos tratos a través do recoñecemento dos primeiros signos e síntomas que anticipan o que pode converterse unha relación tóxica e mesmo violenta

O presidente da Asociación de Pescadores do Miño, Fernando Ferreira, comentounos hoxe no programa Día a Día cómo está a ser a temporada do meixón e da lamprea.

A Casa Taller da Guarda impartirá este sábado un curso de Theremin, instrumento electrónico que soa sen tocalo fisicamente. Será teórico e práctico e rematará pola tarde cun concerto con proxeccións audiovisuais.

Alumnado do CEIP nº1 e nº2 de Tui asisten dende hoxe a unha Xornadas de Seguridade Vial organizadas pola Concellería de Seguridade do Concello de Tui coa colaboración da DXT e da Policía Local.

Helena Rodríguez, coordinadora de Educación vial da Xefatura de Tráfico de Pontevedra, explicaba que esta mañá explicaron xa aos cativos os contidos teóricos desta campaña e logo fan prácticas do aprendido na unidade móbil do parque infantil de tráfico instalada estes días no patio do CEIP nº2.

A Sala Félix Rodríguez da Área Panorámica acollerá este venres, 20 de xaneiro, ás 18h unha charla sobre a mediación. Os asistentes á charla poderán coñecer polo miúdo coma a mediación pode axudar na resolución de conflitos, sendo un medio alternativo ou complementario a un proceso xudicial aplicable no ámbito familiar, empresarial, de comunidades de veciños.