Día a Día

Este martes deron comezo as visitas guiadas de balde que organiza o Concello de Tui polo casco histórico. Suso Vila, historiador tudense que se encarga desta iniciativa, explicounos en que van a consistir as distintas ofertas. De luns a venres hai unha visita ás 12h para coñecer a cidade medieval e outra ás 20h ao barrio xudeu. As fins de semana e os días festivos haberá unha única visita con percorrido pola cidade histórica.

Ás oito e media desta tarde o colectivo contra a moción de censura en Tui convoca unha concentración diante da casa do concello. Así nolo contaron Juan Boo, Lolo Alonso e Silvina Bouza membros deste colectivo.

Dende hai quince días comezaron a recollida de sinaturas en apoio ao manifesto que emitiron contra a presentación dunha moción de censura. Levan xa recollidas máis de mil sinaturas que mañá teñen a intención de entregar no pleno ordinario da corporación municipal.

Converxencia 21 acordou onte en reunión extraordinaria suspender as negociacións para formar un goberno alternativo. Carlos Vázquez Padín, voceiro de C21, explicou hoxe os motivos que os levaron a tomar esta decisión. Agora esas negociacións para a formación dun goberno alternativo quedan en situación de impás ata a toma de posesión dos novos concelleiros, pero tamén existen outras precondicións coma son que eses concelleiros estean a favor da moción de censura e que exista amais un acordo programático.

Do 31 de xullo ao 4 de agosto celébrase a primeira edición do Campus de Fútbol Verán Solidario no campo de fútbol Álvarez Durán. Falamos co secretario do Tyde FC, equipo organizador desta iniciativa, que nos deu conta dos detalles das actividades que poderán facer os nenos que participen.

Mañá de 10 a 21h celébrase no Paseo da Corredoira unha Feira Benéfica de Antigüidades, Coleccionismo, Vintage e Libro Usado da que nos falou o concelleiro de Turismo, Laureano Alonso. Deu conta tamén da actuación prevista ás 20h e do carácter solidario deste evento.

A Noite Internacional do Miño cumple mañá 18 anos organizada pola Escola de Baile e Música San Fins de Rebordáns. A cita será mañá ás 21.30h no Parque do Laxal con grupos de México, Kenia, Letonia e Xeorxia. Deste espectáculo faláronnos María Gándara e Pablo González.

Mañá clausurase o V Festival Internacional de Instrumentos de tecla da Eurocidade Tui-Valença con un recital ibero-americano da man de Carlos César Rodríguez. Falamos con este importante pianista sobre o que vai soar na Igrexa de San Domingos a partir das 22h de mañá, pero tamén do seu papel como profesor nas masterclases do festival e da experiencia como director dos dez pianos que soaron durante a inauguración do venres na vella ponte internacional.

Dobre proposta musical na casa betuneira esta fin de semana. Coma hoxe nos contou Jorge Aldir esta noite ás 23.30h Bizarre Freak Party con Pumoso con Gaseosa. E mañá ás 21.30h en concerto Jaguars e Salvaje.

A Fortaleza de Valença acolle o sábado ás 23h o concerto "Cancións para sempre" da man de Gabriela Rodríguez e Daniel Pereira. Este último explicounos que se trata dun evento musical para todos os público onde haberá repertorio de clásicos da canción. A entrada será de balde.

En 2020 debemos reciclar o 50% do lixo que xeramos. Na actualidade aínda estamos lonxe desa porcentaxe e só reciclamos o 18% do lixo. A instalación de composteiros comunitarios busca reciclar tamén o materia orgánica que deste xeito se converterá en compost. En Tui hai tres puntos de composteiros comunitarios, na Avenida de Portugal, na rúa Compostela, e na traseira da Área Panorámica. Este último punto vén de abrirse e por este motivo convócase aos veciños da zona a unha reunión informativa o mércores 26 ás 21h na Sala Xacobeo. Así nolo contaron hoxe o concelleiro de Medio Ambiente, José Martínez Tato, e o mestre composteiro, Manuel Gómez.