Día a Día

Hoxe ás 22h na Asociación Cultural Betún actúan os “Sulfur Giant” que finalizan en Tui o seu primeiro tour europeo presentando o seu último álbum Beyond The Hollow Mountain, tamén estarán os guardeses MilHomes. Entrada socios/as beta 2,5€ betuneiros/as de balde

Xa o sábado ás 22h inaugúrase a exposición Ecos da Penumbra, do fotógrafo portugués Miguel Estima. As 22:30, dentro das Sesións HALO, chega o concerto de Kotka - Band formado por Risto Vuolanne, Guillermo Bazzola e Fer Lamas. Contouno Jorge Aldir.

O IES San Paio conmemora mañá sábado, 17 de decembro, ás 12h no vestíbulo do centro os 25 anos que levan o actual emprazamento na rúa Casal Aboy. En 1991 as vacacións de Nadal foron aproveitadas para facer o cambio dende o vello IES San Paio - hoxe Área Panorámica - ao novo centro. Contounolo o director do centro, Manuel Caldas.

A voceira do BNG e concelleira de Patrimonio, Carmen Núñez, valorou hoxe na nosa sintonía que neste ano e medio de mandato se está avanzando en temas vitais para o futuro de Tui coma a apertura da rúa Ourense e a aprobación de Tui. Recoñecía que se dan pasos pese as dificultades de ter non contado con secretaria municipal durante meses, e tendo en conta que son un goberno en minoría formado por catro grupos políticos. Hoxe estivo en Día a Día dentro da rolda de conversas cos grupos políticos.

Sobre o papel do seu grupo sinalou que a actitude do BNG é colaboradora dende o principio.

Hoxe, dentro da programación dos Faladoiros de Educación organizados polo Concello de Tui e o Colexio Rural Agrupado Mestra Clara Torres, celebrarase unha carla relacionada con internet e as redes sociais.

Este domingo celébrase a Andaina Solidaria organizada polo Club AndaTui. Sairá ás 10h hora española da Porta do Sol Nacente de Valença para vir camiñando ata Tui e regresar ao punto de partida, tras percorrer 8 quilómetros de dificultade doada.

O voceiro de Ciudadanos Tudense, Manuel González Vázquez, estivo hoxe na RMT dentro da rolda de conversas que estamos a manter cos grupos políticos da corporación municipal de Tui. Foi crítico coa xestión do goberno neste ano e medio e apuntou coma prioridades a aprobación do PECH, e resolver o problema de aparcamento no casco urbano. A rúa Ourense, a Área Metropolitana, ou as conversas co PP para a reunificación da dereita en Tui foron outros dos temas tratados.

Este xoves o Teatro Municipal de Tui acollerá a celebración do Concerto de Nadal do Conservatorio de Música tudense. Este ano a gran novidade é a presentación do novo piano adquirido polo concello de Tui. Un instrumento único en España e que permitirá gozar da música dos pianistas tudenses.

Esta noite no Betún será noite de Discobeta unha selección musical betuneira feita polos propios socios. Mañá sábado, ás 22h, chega o concerto de La Rock - Blues Band, un grupo que fai versións de diferentes grupos pasando polos estilos do rock, pop, blues, soul.

Mañá xoves celebrase en Tui unha nova Feira de Artesanía do Nadal, desta vez na Praza de San Fernando e que ten como principal obxectivo recoller alimentos para SOS Tomiño Baixo Miño. Está organizada pola Asociación de Artesáns de Tui.

Valença promociona este ano as súas festas de Nadal con oito motivos polos que debemos achegarnos até a vila entre o 1 de decembro e o 8 de xaneiro. Durante eses 39 días estará aberta unha pista de patinaxe sobre xeo por primeira vez na cidade. Ademais, durante as mesmas datas diferentes puntos de Valença acollerán unha exposición de beléns. Pola súa parte, a Fortaleza de Valença, vólvese de chocolate, con postos de crepes, gofres, bombóns ou turróns ademais da gastronomía típica portuguesa.