Día a Día

Catorce quilómetros entre Tui e Valença nunha ruta nocturna será os que realizan os participantes na Urban Trail Night prevista para o sábado 26 de novembro na Eurocidade Tui-Valença. O prazo de inscrición está aberto ata o mércores 23. Tamén haberá unha andaina de 10 quilómetros. Deunos todos os detalles da proba, Serafín Martínez, organizador. www.urbantrailnight.com.

O enxeñeiro tudense Juan Font está detrás da programación de Politibot, un robot conversacional para Telegram que está operativo dende as eleccións do pasado 26J. Forma parte dun equipo multidisciplinar de oito persoas que levaron adiante este innovador proxecto que vén de recibir unha axuda á investigación de Google. Este achega permitiralles converterlo en multiplataforma e proseguir co seu desenvolvemento. Así nolo explicou Juan Font, quen arestora traballa coma enxeñeiro de software no departamento de tecnoloxía da información na Axencia Espacial Europea.

Os representantes do Sindicato Unificado da Policía de Galicia, presentaron no Concello de Tui un escrito denunciando o que consideran como “lamentable estado de conservación” do Centro de Cooperación Policial e Aduaneiro de Tui. O SUP denuncia as humidades e deficiencias múltiples do edificio, que é de titularidade estatal.

Victoria Pérez e Manu Fernández de Pérez&Fernández presentan mañá venres ás 20h no Teatro Municipal de Tui "O poder de Amabel". Unha obra de monicreques e actores que nos contan a historia de Amabel e Braulio que lembran un verán de cando eran nenos. As entradas están á venda ata maña venres ás 12h en www.culturatui.info ou mañá dende ás 18.30h no despacho de billetes ao prezo de 3,5€ e 2,5€.

Ás 20h na Catedral terá lugar o concerto inaugural do 86º Concurso Permanente de Jóvenes Intérpretes de Juventudes Musicales de España a cargo de Aaron Ribas, gañador do concurso na especialidade de órgano na edición de 2015. Hoxe Aaron Rivas acompañounos no programa Día a Día onde nos falou da súa carreira e do concerto desta tarde.

Segundo os datos do INE, 1 de cada 5 fogares en España vive baixo o limiar da pobreza e o director do Banco de Alimentos de Vigo, Pedro Pereira, lembraba que esta mesma semana unha muller morría en Cataluña despois de que lle cortaran a luz e tivera que vivir sen electricidade e alumeando a súa vivenda con velas. Por isto, Pereira, lembrou que aínda moita xente sofre de pobreza invisible, que non se ve no día a día. Neste ano o banco de alimentos porá o foco na solicitude de comida precociñada que permita aforrar en electricidade as persoas que máis o precisan.

O Concello de Tui non ten intención de pechar todos os locais de ocio no conxunto histórico pero sí que este cumpran coa legalidade vixente tanto en materia urbanística coma en horarios de peche e emisión de ruídos. Así o deixou explicou na nosa sintonía o alcalde de Tui, Enrique Cabaleiro, puntualizando que “esta non é unha cuestión de intencionalidade política senón de cumprimento da legalidade”.

Dende o Concello para regular a situación existente téñense inspeccionado a meirande parte dos locais de ocio do conxunto histórico para verificar que cumpren coa normativa

Tui acollerá dende este xoves 17 e ata domingo 20 o concurso permanente de Juventudes Musicales de España en concreto nas probas de piano, clavicémbalo e órgano. A organización corre a cargo de Xuventudes Musicais de Tui.

Estas audicións, que se celebrarán no Teatro Municipal, na igrexa de San Telmo e na Catedral,serán abertas ao público. Participarán 31 xoves músicos de toda España. Así nolo contou Andrea González.

Este domingo celébrase a derradeira andaina do Circuíto de Andainas Saudables da Eurocidade. O percorrido será polo Trilho das Dúas Bandas. A saída será ás 10.00 horas españolas, dende a Igrexa de Boivão (Valença), ou ás 9.40h dende o aparcamento do Lidl en Valença.

Este venres comezará a impartirse na Aula da UNED de Tui o curso “Guía de supervivencia para pais agobiados”. Vai dirixida a pais, profesores e coidadores infantís co obxectivo de brindarlles as ferramentas precisas para solucionar os problemas de conduta máis habituais nos nenos de 2 a 12 anos.