O grupo de teatro de San Fins de Rebordáns estreará hoxe ás 21.15h no Teatro Municipal “A mesa do rincón” escrita por Mila Oya, dentro da VIII Semana de Teatro Afeccionado. O prezo da entrada é de 1,5€ e poranse á venda, no despacho de billetes, a partir das 20.45h. Sofía González e Álvaro Iglesias, dous dos dez actores do grupo, faláronnos da súa obra.

O Liceo Casino de Tui acolle este sábado, 2 de abril, e este domingo 3, de 11.30h a 20.30h unha Feira de Artesanía e Agrosaudable organizada por esta entidade xunto ao colectivo MasKArte. Eva Iglesias, presidenta do Liceo Casino e Susi Pérez, de MasKArte déronnos conta de todos os detalles desta cita.

Este domingo celébrase no Paseo da Corredoira o Festival do Meixón organizado polo Concello coa colaboración de diferentes restaurantes da cidade. O concelleiro de Turismo, Laureano Alonso, explicou que dende o Concello foron receptivos ao interese na celebración deste evento gastronómico por parte dos restauradores locais.

Na carpa instalada neste céntrico paseo os cociñeiros de varios restaurante locais serán os encargados de preparar as 500 racións deste produto, servidas en cazola de barro e acompañadas de pan e viño albariño. O prezo da ración é de 40€.

O Espazo Xove de Tui ofrece nesta semana dous cursos para os que aínda quedan prazas. Mañá desenvolverase unha actividade formativa para aprender a usar o programa Power Point. Esta iniciativa prolongarase os días 1, 6, 8 e 13. Tamén quedan prazas para o curso de Contacontos que terá lugar este xoves e venres en horario de 16.30h a 20.30h.

Este domingo celébrase a VI Cata de Colleiteiros de viños brancos e tintos #SanTelmo2016. Os colleiteiros tudenses interesados en participar deben entregar dúas mostras en Tapas e Viños. Marina Cruces, promotora desta cata deunos hoxe todos os detalles.

O grupo de teatro Chirlomirlo de Randufe estreará ás 21.15h no Teatro Municipal “Romeo e Xulieta”, dentro da VIII Semana de Teatro Afeccionado #SanTelmo2016. Areta Bolado dirixe aos dez actores que dan vida a esta comedia que presenta unha versión cómica da obra clásica. As entradas, ao prezo de 1,5€, poranse á venda ás 20.45h. Hoxe falamos con Areta Bolado.

Hoxe ás 21.15h no Teatro Municipal comeza a VIII Semana de Teatro Afeccionado San Telmo. O grupo de teatro Aloia de Pazos de Reis será o responsable de abrir esta Semana coa estrea da comedia “O caso da muller asasinadiña” baixo a dirección de Noelia Solla e con nove actores en escena. As entradas poranse á venda, ao prezo de 1,5€, dende ás 20.45h no despacho de billetes.

Balance positivo do inicio das festas de #SanTelmo2016 o realizado pola concelleira de Ensino e Cultura, María José González. Na nosa sintonía referiuse ás actividades infantís, á semana do teatro afeccionado, e as distintas actuacións previstas para os próximos días.

Para aplicar produtos fitosanitarios, sulfatos e outros, é preciso conta con carné de aplicador destes produtos que se obten tras realizar o pertinente curso. Hoxe falamos destes cursos con Rosario González de BM Formación, que están a impartir estes cursos en distintas parroquias de Tui.

Hoxe conversamos co concelleiro de Deportes do Concello de Tui, Laureano Alonso sobre diversos asuntos. En primeiro lugar falamos sobre a recepción que se vai realizar ás 19.30h no salón de sesións da Casa do Concello ao Club Kayak Tudense, ao triatleta Gustavo Rodríguez e aos remeiros do Club Remo do Miño Tui polo seus recentes títulos a nivel nacional. Tamén debullamos o amplo abano de actividades deportivas polas festas de #SanTelmo2016