Día a Día

Marcos González, presidente da escudería Dona Urraca, responsable do II Rallie Eurocidade que se celebra esta fin de semana en Tui. Marcos, quen agradeceu o apoio dos veciños que conviven estes días cos cortes puntuais no tráfico para as probas dos 100 pilotos, lamentou que a "disputa de competencias entre as diferentes federacións" impedira poder celebralo tamén en Valença.

Dende a Asociación Lazoiro avisan da posible reaparación da praga de nematodo que afecta aos piñeiros. Dende Lazoiro destacan o gran problema e alarma que xa supuxo en anteriores ocasións causadas pola, na súa opinión, "gran descoordinación na propia Consellería de Medio Rural e demais organismos implicados".

O Teatro Municipal de Tui acolle este venres, en dobre función ás 17.30h e ás 19h, a representación da obra de teatro para bebés "Zapatos" da man de Caramuxo Teatro. Laura Sarasola é a actriz que estará sobre o escenario, e hoxe falounos deste espectáculo.

As entradas teñen un prezo de 3€ e 2€. Están á venda en www.culturatui.info ata o venres ás 12h ou o venres no despacho de billetes dende as 16:45h e ata ás 17:30h para a función das 17.30h; e de 18:15h a 19:00h para a función das 19h.

Este mediodía tivo lugar na Praza de Abastos da Guarda unha degustación gastronómica de pratos elaborados con produtos típicos da zona. A degustación, foi elaborada polo profesorado e alumnado dos centros públicos Carlos Oroza de Pontevedra e Manuel Antonio de Vigo, e impulsada pola Deputación de Pontevedra dentro do programa “Degusta Europa”.

A aparición o pasado domingo dun cabalo con trancas no entorno do Monte Aloia volveu por de actualidade unha práctica aínda habitual nos montes galegos. O coordinador de Libera, Rubén Pérez, alertou esta mañá no programa Día a Día da ineficacia dos cepos. A asociación conta cunha páxina web, www.senpexas.info na que poder denunciar a existencia de cabalos con cepos, cadeas ou cordas.

Mañá mércores o Consorcio de Augas do Louro vai continuar coa segunda actuación de obras encamiñadas a mellorar a calidade da auga potable na cidade de Tui. O xefe do servizo do consorcio, Ramiro Gutiérrez, da conta das actuacións na rúa Colón. A substitución da redutora de presión, que busca modernizar a rede para evitar que os cambios na presión provoquen roturas imprevistas, produciranse en horario de mañá e a última hora da noite.

Accións artísticas que chamen a reflexión crítica sobre a pandemia que supón a violencia machista. Ese é o obxectivo da exposición que, no seu recorrido por distintos concellos da provincia, abre hoxe as súas portas na Área Panorámica de Tui. En total, 11 artistas galegas reflexaron as súas emocións a través do diálogo aberto con todos os públicos no que se sensibiiza á cidadanía.

Fomentar o deporte náutico tanto en persoas con discapacidade coma sen discapacidade é o obxectivo do Club Deportivo Sen Amarras que comezou a súa actividade na comarca do Baixo Miño. Susana Costa é a súa presidenta e Fina Pereira unha das 24 persoas que na actualidade integran este colectivo. No programa Día a Día explicaron coma o club xurdiu dunha actividade realizada pola Asociación Vontade, e deron conta das primeiras actividades realizadas.

Para este ano teñen xa fixado un calendario de actividades que inclúe un curso para obter a licenza de navegación este mes, e probas de slaloms en Tui, A Guarda e Tomiño entre xuño e agosto.

O presidente da Federación de Nais e Pais de Pontevedra, Rogelio Carballo, pasou esta mañá polos micrófonos da RMT nos que alertou aos pais das consecuencias que podería ter non acudir as avaliacións que comezaran nos próximos días en 6º de primaria dentro do marco da Lomce, namentres lamentou a "tremenda inxustiza" que supoñen.

Dende hoxe e ata finais de mes poderase visitar na Sala de Exposicións Municipal na Área Panorámica a exposición conxunta de escultura de Raimundo Martínez e Antonio Abero. A apertura da mostra terá lugar ás 20.30h. Os dous escultores falaron da súa obra hoxe no programa Día a Día.