Día a Día

Tras a sinatura de onte entre a Consellería de Educación e os concellos da provincia hoxe falamos co xefe territorial de Educación. César Pérez Ares, quen deu conta da importancia de sumar esforzos entre as distintas administracións para acometer obras no colexios. Referiuse ao investimento previsto no Baixo Miño, así coma tamén a redacción dunha ficha técnica para a futura construción dun novo colexio en Pazos de Reis.

A concelleira de Ensino do Concello de Tui, María José González, deu conta hoxe do investimento que se vai realizar nos centros educativos do municipio, tanto a través do convenio asinado onte coa Consellería de Educación, coma de fondos propios A reforma da cuberta do CEIP de Rebordáns, é unha das obras prioritarias a acometer no verán.

Carlos González-Juanatey, presidente da Asociación Galega de Cardioloxía analiza os datos do último estudio elaborado pola Sociedade Española de Cardioloxía o cal establece que Galicia é a segunda comunidade autónoma con maior porcentaxe de obesidade ao alcanzar a un 24,9% da poboación.

O presidente do Di-Som Tui, Eduardo Méndez Sanjurjo, ven de conseguir octavo dan, o grado máis alto de Kung-Fu recoñecido por unha federación a nivel nacional. Esta mañá, explicaba no noso estudio a importancia do galardón, non só para o club senón tamén para a cidade que acollerá o Terceiro Campionato Ibérico Internacional de Kung-Fu o próximo 19 de xuño.

Unha historia alternativa da emigración galega é a que conta a obra “Balor na acción dunha cadeira” que mañá ás 21h representa no Teatro Municipal de Tui Artesacia.

A obra está dirixida por Roi Fernández, que tamén forma parte do elenco xunto a Laura Villaverde, e Simón Piñón. Os tres falaron hoxe da obra no programa Día a Día. As entradas están á venda en www.culturatui.info ata mañá venres ás 12h e mañá dende ás 19.30h no despacho de billetes ao prezo de 6€ e 4,5€.

O alcalde de Tui, Enrique Cabaleiro, asistiu onte en Vigo á reunión sobre a Área Metropolitana de Vigo na que se fixaron prazo concretos para seguir avanzando nesta entidade supramunicipal, á que Tui podería incorporarse a comezos de 2017. Tamén falaron do transporte metropolitano. Pola tarde o rexedor tudense asistiu en Barcelos á reunión do grupo de traballo sobre o Camiño Portugués e a presentación de proxectos a fondos do POCTEP 2016-2020. Xa esta mañá asinará un convenio con Educación para a mellora de centro educativos. Destes encontros falou hoxe Enrique Cabaleiro na nosa sintonía.

As redes oficiais de información comunitaria en Galicia e no Norte de Portugal organizan para este venres, 6 de maio, a acción conmemorativa “UE: 30 anos xuntos”. Esta actividade celébrase para conmemorar o 30 aniversario da adhesión de España e Portugal á Unión Europea. Cristina Couto, coordinadora Europe Direct, deunos conta dos obxectivos e de cómo será esta celebración.

O pianista e compositor Alberto Vilas presentará este sábado 7 de maio ás 20:30 horas no Auditorio da Xunqueira, en Redondela, o seu novo álbum titulado "Ubuntu". Acompañan ao compositor como é habitual Rosolino Marinello, Juansy Santomé e Javier Barral amais da colaboración especial de Diana Tarín.

O tudense Avelino Martínez participará no mes de xuño no Campionato de Europa de judo na categoría de veteranos en Huelva. Previa a esta cita participou no Campionato de Portugal onde logrou a medalla de Ouro no Open de Lisboa de Veteranos e a prata no Nacional. Con el falamos esta mañá.

A Deputación de Pontevedra e a CIM Alto Minho traballan na constitución dunha Asociación Europea de Cooperación Territorial, a AECT Río Miño, que contará con entidade xurídica propia. Toman coma modelo a seguir do grupo interrexional do Río Danubio, que reúne a dez países para potenciar o territorio do río centroeuropeo. O obxectivo neste caso é desenvolver o territorio da fronteira. Tamén avanzan na redacción dun documento estratéxico. Destas cuestións falou hoxe na nosa sintonía o deputado Uxío Benítez.