O Colexio Rural Agrupado Mestra Clara Torre de Tui organiza unha recollida de xoguetes de cara ao Nadal. Teresa Domínguez, directora do CRA, apuntou que os xoguetes, xogos de mesa educativos, libros de lectura ou contos que se donen deben estar en bo estado. Ata o 15 de decembro pódense entregar os xoguetes na Radio Municipal de Tui, nas aulas do CRA en Pexegueiro, Malvas, Areas, Ribadelouro, Guillarei, Paramos, Baldráns e Caldelas, e na sede do CRA no colexio número 2.

O domingo, 6 de decembro, de 11 a 21h, celebrarase no conxunto histórico de #Tui un Mercado de Nadal solidario, promovido por ACITUI, Somos Arte e o colectivo +KARTE. Hoxe venres visitaron os nosos estudios Juan Carlos Blanco, presidente de ACITUI, María Jesús Pérez Diz, presidenta en Funcións de +KARTE e Abel Vila, Secretario de ACITUI, para darnos todos os detalles desta iniciativa.

Hoxe ás 20.30h celebrarase no Teatro Municipal de Tui a IV Gala do Deporte Tudense.Nesta festa do deporte recoñecerase o traballo realizado por deportistas, clubs, adestradores e entidades. Da mesma falou hoxe na nosa sintonía o concelleiro de Deportes de Tui, Laureano Alonso. Tamén se referiu á feira de Nadal que terá lugar o domingo 6 de decembro.

Ata o 10 de xaneiro pode visitar a exposición "Paisaxes Mentais" de Nel Díaz Piñeiro na Sala de Exposicións da Área Panorámica en Tui. Segunto o artista, Nel Díaz Piñeiro, reflicte a súa teima polo paso do tempo e o movemento.

Este venres e sábado, SOS Tomiño Baixo Miño colabora co Banco de Alimentos de Vigo nunha gran recollida de alimentos en supermercados de Tui e Tomiño. Polo tanto, fan un chamamento a que se unan voluntarios para recoller estes alimentos nos supermercados e axuden a este labor. Os establecementos adheridos á campaña é o Gadis, Día e Lidl de Areas, Día de Tomiño e de Tui, e supermercado Familia de Tui.

Hoxe conversamos co alcalde de Tui, Enrique Cabaleiro, sobre diversos asuntos de interese. Co rexedor debullamos entre outros puntos, que ó Pleno levarán unha moción para demandar á Xunta a construción da nova escola para Pazos de Reis e dun Centro de Día na finca da Lagarteira. Ademais, tamén exporán no Pleno á petición á Xunta de Galicia da necesidade de trasladar as dependencias dos Xulgados ós antigos terreos de Camfram, debido á falla de espazo.

José Martínez Tato, concelleiro de Medio Ambiente e Limpeza viaria, expresou que nos vindeiros días van acometer a limpeza de diversos viarios nas entradas de Tui, e de estradas de parroquias. Así o relatou na nosa sintonía, durante o Día a Día. Na conversa mantida tamén debullou outros asuntos, como a xuntanza coas asociacións culturais sobre o curso de fitosanitarios que vai ter lugar este xoves ás 19.30h e a charla sobre a vespa velutina deste venres ás 18.30h. ámbalas dúas na Sala Félix.

Mañá mércores celébrase o Día Internacional contra a Violencia de Xénero. En Tui, a Deputación de Pontevedra organiza unha performance ás 12 do mediodía na Praza da Catedral de Tui. A artista Neves Seara interpretará o Amante de Sal.

Amante de Sal é unha proposta que conecta moi ben co público e reivindica a figura das mulleres que están ausentes por culpa da violencia. A inseguridade pola falla de visión e peso no seu espectáculo, irán acompañando os 54 pasos que realizará a artista a través de 54 kg de sal polas 54 mulleres homenaxeadas falecidas o ano pasado.

Hugo Laje vai dar unha charla no Espazo Xove de Tui sobre o crowdfunding, ou o financiamento colectivo. Esta actividade terá lugar este venres dende as 4 da tarde, e está destinada a aquelas persoas que queiran emprender neste tipo de accións.

O que se vai traballar no encontro son os diferentes tipos de crowdfunding e coñeceranse proxectos prácticos de accións emprendidas e que obtiveron éxito e outras que non o alcanzaron.

Hoxe conversamos con Felicita Iglesias, vocal da Asociación de Parkinson Baixo Miño, sobre unha nova acción que vai arrincar en poucos días. Esta actividade, que se realizará este xoves ás 5 da tarde, consiste en que as persoas interesadas na Asociación poden acudir á cafetería do Centro Sociocomunitario de Tui, coñecer os traballos da organización dunha forma máis relaxada, mentres se toman un café. Felicita Iglesias indica que arestora hai arredor de 20 socios e dende a Asociación con estes encontros pretenden coñecer de primeira man o que demandan os enfermos e as súas inquedanzas.