A pasada semana coñeciamos que o exalcalde de Tui, Moisés Rodríguez, foi imputado por un presunto delito de desobediencia por non tramitar, supostamente, o expediente de reposición da legalidade e peche dun ximnasio no casco urbano do municipio. O dono do ximnasio, Disom, Eduardo Sanjurjo, estivo hoxe na nosa sintonía para deixar unha mensaxe clara, o ximnasio está aberto e funcionando.

Eduardo Sanjurjo deu conta que cumpren todos os requisitos legais para obter a licencia de actividade e que levan 25 anos agardando.

Hoxe venres, ás 20h, na Sala Xacobeo da Área Panorámica, Exposición e Conferencia da Fundación Vicente Risco en Tui. A Conferencia está impartida a cargo de Luís Martínez Risco, Presidente da Fundación Vicente Risco e historiador. Presentará “A cultura alicerce da unión Galicia-Norte de Portugal. Lusofonía”, dentro do programa “A cultura que une”. Luis Martínez Risco apunta cales son as liñas nas que versará a súa charla.

Este domingo 22 de novembro, a partir das 14h. españolas, no pavillón municipal de Valença, terá lugar o III Trofeo de Baile Deportivo no que participarán 140 parellas procedentes de Galicia e doutras comunidades, ademais de Portugal. Esta competición, que está organizada pola Eurocidade Tui-Valença e a Escola de Baile Pasos Galicia, prolongarase ata as 21h. españolas. Miguel Abreu, responsable do Trofeo, mostrouse moi satisfeito polo elevado número de parellas inscritas nos nosos micrófonos.

Co gallo de incentivar o comercio local tudense e aumentar as súas vendas, a asociación ACITUI organiza o BlackFriday, ou o venres negro, unha oportunidade de mercar máis barato o vindeiro venres 27, de 20h a 00h con descontos de ate o 60%. O BlackFriday, que naceu en EEUU, estase popularizando en todo o mundo.

Hoxe estiveron na nosa sintonía Miguel Martínez Rodríguez, vicepresidente de ACITUI, e Abel Vila Martínez, secretario.

Co gallo de incentivar o comercio local tudense e aumentar as súas vendas, a asociación ACITUI organiza o BlackFriday, ou o venres negro, unha oportunidade de mercar máis barato o vindeiro venres 27, de 20h a 00h con descontos de ate o 60%. O BlackFriday, que naceu en EEUU, estase popularizando en todo o mundo.

Hoxe estiveron na nosa sintonía Miguel Martínez Rodríguez, vicepresidente de ACITUI, e Abel Vila Martínez, secretario.

A Catedral de Tui vaise beneficiar de dúas obras nas súas dependencias. Así, a primeira delas contempla a restauración das cubertas debido a humidades, e que vai ser executada pola Xunta de Galicia. A segunda obra refírese á musealización do claustro da Catedral, acción levada a cabo polo Ministerio de Fomento. José Diéguez Dieppa é o Deán da Catedral.

Como cada luns, repasamos con Mónica Bugarín, as propostas do Espazo Xove de Tui.

Este venres 20 realizarase un obradoiro, mais as prazas xa están cubertas. Mónica Bugarín recomenda inscribirse para o obradoiro que se celebra o día 11 de decembro e no que hai prazas dispoñibles. Por outra banda, o venres 27 haberá un curso de crowdfunding, de 16.30h a 20.30h, totalmente gratuíto polo que hai prazas dispoñibles.

A Fiscalía de Pontevedra arquivou a denuncia presentada polo PP de Salceda en maio deste ano contra o alcalde Marcos Besada por presunta prevaricación.

O pasado mes de setembro Marcos Besada prestou declaración ante o fiscal Xefe de Pontevedra, Juan Carlos Aladro, en calidade de investigado por un presunto delito de prevaricación.

Marcos Besada amosouse nos nosos micrófonos satisfeito pola decisión da Fiscalía e que a denuncia non é máis que unha nova derrota do Partido Popular, que decidiu xudicializar a política en Salceda para intentar conseguir o que lle negan as urnas.

Nerea González Martínez, moza tudense que traballa como Au-pair en París, contounos durante o Día a Día o medo vivido xunto ás súas amigas, durante a noite do pasado venres, polos atentados acontecidos en París.

O Conservatorio de Música Profesional de Tui convoca un concurso entre o seu alumnado para elixir o logotipo do centro. Beatriz Cristóbal, secretaria do Conservatorio, explicou como xurdiu esta iniciativa. O prazo para a presentación de traballos está aberta ata o mes de febreiro.