Día a Día

A semana próxima, o luns e martes pola mañá, de 11h a 13h, o Espazo Xove organiza unhas xornadas de xogo aproveitando as vacacións de Nadal, destinadas a nenos e nenas entre 8 e 10 anos. Hai soamente 10 prazas dispoñibles e é preciso inscrición previa.

Por outra banda, Mónica Bugarín deu conta que os días 24 e 31 o Espazo Xove estará pechado.

Diego Alfonsín Rivero estase facendo un nome coñecido no mundo literario. Gañou o premio no concurso de contos Max Aub o ano pasado e este ano vén de conseguir o primeiro premio no certame de novela curta de Miguel de Unamuno coa novela “Lenta Demolición”.

Hoxe recibimos nos nosos estudios ó director do Conservatorio de música profesional de Tui, Rubén López; a Jorge Vicente, profesor do Conservatorio e a Rafael Llebra, profesor no Conservatorio de Vigo. Os tres convidados deron conta de que para a vindeira semana, concretamente o luns durante a mañá e pola tarde e o martes pola mañá, impartirase unha aula aberta de saxofón no Conservatorio de Tui.

O alcalde de Tui, Enrique Cabaleiro, asistiu o pasado sábado a unha nova reunión para a constitución da Área Metropolitana de Vigo. Esta supramunicipal comezará con 14 concellos, e de xeito inmediato se ampliará a 20 municipios, entre eles o do Tui, para o que é preciso a aprobación por parte da Xunta de Galicia. Para Enrique Cabaleiro esta área conformada por 20 concellos terá gran pese e envergadura. A adhesión de Tui á mesma suporá para os veciños un abaratamento no transporte metropolitano, ou a baixada de taxas ao consorciarse distintos servizos.

A piscina municipal de Valença acolle mañá sábado, a partir das 16.00 horas españolas, o IV Torneo de Natación de Nadal da Eurocidade. Está organizado polo Club de Actividades Acuáticas Alto-Baixo Miño, en colaboración coa Eurocidade Tui-Valença. No mesmo daranse cita un centenar de nenos e nenas das distintas escolas deportivas de natación do Baixo-Alto Miño.

Mañá sábado celébrase o derradeiro percorrido do IV Circuito de Andainas/Trilhos Saudables da Eurocidade. Será polo Trilho de Mosteiró na freguesía de Cerdal en Valença. Sairá ás 10h hora española dende a igrexa matriz de Cerdal, ou quince minutos antes do aparcamento do Lidl en Valença.

Esta andaina consta de 11,8 quilómetros de percorrido de dificultade doada, cun tempo estimado de 4 horas e media.

O cárcere vello en Tui acolle mañá sábado de 10 a 14h un novo Mercado da Verdura coa venda de produtos ecolóxicos. Amais mañá haberá unha charla e exhibición do calabizo, chourizo de cabaza cuxo ingrediente principal é a cabaza con especias e aceite de oliva, elaborado por Fiablone,

Edurne Sendra é unha das socias de Fiablone e explicaba hoxe na nosa sintonía que é o calabizo, no levan traballando preto de dous anos, e hai un par de meses o lanzaron ao mercado onde teñen unha gran acollida.

Alejandro Da Cuña presentará mañá sábado, ás 19h, no Teatro Municipal de Tui o seu libro "Receitas con historia" no que vén traballando ao longo de dous anos e medio. Dende ás 18.30h poderanse retirar as entradas de balde, un máximo de dúas por persoa, no despacho de billetes. O libro, cun prezo de 10€, está xa á venda nas librarías tudenses. Os fondos recadados irán destinados ás asociacións Síndrome de Rett, e Síndrome deleción 1p36.

A Asociación de comerciantes de Tomiño, a ADETO, inicia a súa campaña de Nadal con diversas actividades para impulsar as vendas no comercio. David Vila explicou que dende ADETO están sorteando vales de compras nos comercios, que van dende os 5 euros ata os 200 euros, acción que comezou o pasado luns 7 de decembro e rematará o 7 de xaneiro.

Aparte este ano hai unha novidade, xa que esta fin de semana, na Rúa da Guarda, realizarán un pequeno centro comercial para que os que se acheguen a Merca Nadal poidan adiantar as súas compras nestas datas.

Co gallo de coñecer as actividades que organiza a asociación de comerciantes de Tui, a ACITUI para estas datas, hoxe mantivemos unha conversa con Juan Carlos Blanco, presidente de ACITUI, e Abel Vila, secretario da asociación. Para dinamizar o comercio neste Nadal, a asociación levará a cabo o concurso de escaparates, no que xa están inscritos arestora como participantes 22 comercios. O prazo de inscrición remata mañá.

Tamén dende ACITUI convidarán a Papa Noel para que reparta caramelos e recolla as cartas dos máis pequenos. Estará os días 19 e 20 desde as 17h e as 20h e os días 22, 23 e 24 dende as 16.30h ás 19.30h.