Día a Día

A Asociación Xuvenil e Cultural do Traxe Tradicional de Tui organiza esta fin de semana as Xornadas de Nadal de Gaita e Percusión Doméstica Tradicional Galega. Terán lugar sábado e domingo a cargo de Santi Lage e Erik Feles coma profesores. Os interesados aínda están a tempo de inscribirse no 627 88 35 45. O prezo é 20€ un día e 30€ as dúas xornadas.

A Asociación de Empresarios da Guarda, ACIGU, ten en marcha a súa campaña de Nadal con diversas actividade ao longo destas festas para incentivar e promocionar o comercio local. Este mesmo sábado comezan con propostas de lecer no entorno da Alameda, non na propia Alameda que ese día acolle un acto político. Os outros sábados de mes tanto a Alameda coma a Praza Nova serán o escenario das actividades programadas, ás que se suman a presenza de Papa Noel e inchables. Estes días porán en marcha tamén o aparcamento no patio do colexio dos Pais Somascos para facilitar as compras.

O alcalde de Tui, Enrique Cabaleiro, traslada hoxe ao subdelegado do Goberno os informes da Policía Local e da Garda Civil das pelexas que se están rexistrando en Tui nas últimas fins de semana. O obxectivo é establecer un protocolo de de seguridade que permita a vixilancia e poder contar con máis presenza policial nas rúas. Este é un problema complicado que compete a varias administracións.

O Café Museu organiza unha campaña de recollida de xoguetes de Nadal. Así, dende hoxe 7 de decembro e ata o 22 deste mes, a cafetería cambia un xoguete que estea en bo estado por un café. Esta campaña conta coa colaboración do Concello de Tui e a Radio Municipal de Tui, entre outros.

Emilio Vilar do Café Museu explicou coma xurdiu esta campaña.

Hoxe ás 18.30h terá lugar o acendido da iluminación de Nadal en Tui. Esta é unha das actividades que forma para da axenda conxunta da Eurocidade que foi presentada onte. Da mesma deu conta hoxe a concelleira de Cultura de Tui, María José González. Avanzou que están traballando xa na Cabalgata Internacional de Reis.

Laureano Alonso, concelleiro de Turismo e Deporte do concello de Tui, deu conta hoxe na Rado Municipal de Tui de diversos temas, como a volta do tren turístico que conecta á Eurocidade Tui-Valença para estas datas, os datos de visitantes e turistas que pasaron pola Oficina de Tui no mes de novembro, ou de citas de Nadal coma o Mercado de Nadal deste domingo.

Fortaleza de Chocolate, Duendelandia, Compras con Premios, Tren de Nadal e Festa dos Reis marcan a oferta de Nadal e de Reis de Valença, que se prolongará até o 9 de xaneiro, e que forma parte da Axenda de Nadal presentada en conxunto con Tui. O vereador de Cultura de Valença, José Monte, explicou na RMT que con esta oferta pretenden congregar a moitos visitantes e turistas, implicando á Eurocidade Tui- Valença, ó comercio ou á Fortaleza.

O Mercado de Tomiño prepara actividades de Nadal e é o único de toda a provincia de Pontevedra que ten ocupados todos os seus postos na parte baixa da praza. Así o explicou hoxe a alcaldesa de Tomiño, Sandra González, quen se referiu tamén á licitación de seis postos no primeiro andar que está aberto ata o 15 deste mes.

Hoxe visitou a nosa sintonía o voceiro de Converxencia 21, Carlos Vázquez Padín, dentro da nova rolda de conversas cos partidos políticos que vimos de empezar. Carlos Vázquez Padín manifestou que o grupo de goberno reuniuse co seu partido e co resto dos grupos da oposición para presentarlle as liñas mestras ás que van ir dirixidos os orzamentos para o vindeiro exercicio.

Un ataque informático, por un cryptovirus, mantén dende onte practicamente paralizados distintos departamentos do Concello de Tui. A concelleira Yolanda Rodríguez, explicou en declaracións á Radio Municipal de Tui que onte ao mediodía detectouse o problema nun ordenador e se activou o protocolo de seguridade para estes casos. Técnicos municipai, aos que se sumarán técnicos de Novas Tecnoloxías de Deputación, traballan dende onte para solucionar o problema. Hoxe non funciona nin o rexistro de entrada nin o de saída no Concello. Esta mañá presentarase denuncia por este ataque ante a Unidade de Delictos Informáticos da Garda Civil.